ថ្ងៃទី 11-02-2012 ម៉ោង 14:04:37 បណ្ដាញ ទូរទស្សន៍ជាតិស៊ីរីបានផ្សព្វផ្សាយថា មានការវាយប្រហារគ្រាប់បែក២លើកនៅទីស្នាក់ការសន្ដិសុខ ធ្វើឱ្យកក្រើកញាប់ញ័រទីក្រុងអាឡិបប៉ូ (Aleppo) ភាគខាងជើងប្រទេសនេះកាលពីថ្ងៃទី១០ កុម្ភៈ បណ្ដាលឱ្យមានអ្នកស្លាប់២៥នាក់ និង១៧៥នាក់ផ្សេងទៀតរងរបួស ។
តាមសារព័ត៌មានជាតិស៊ីរីបាន ផ្សព្វផ្សាយថា ការវាយប្រហារគ្រាប់បែកអត្ដឃាត២លើកនៅទីស្នាក់ការសន្ដិសុខនៅទីក្រុង ធំទី២របស់ស៊ីរី ជាការវាយប្រហារទ្រង់ទ្រាយធំបំផុតនៅស៊ីរី សំដៅ លើក្រុមសន្ដិសុខគាំទ្រប្រធានាធិបតីស៊ីរី លោកអាល់ អាសេត ចាប់តាំងពីមានការធ្វើបាតុកម្មកើតឡើងក្នុងរយៈពេល១១ខែកន្លងមក ។
ហេតុការណ៍វាយប្រហារកើតឡើងចំពេល ដែលអំពើហិង្សាកាន់តែខ្លាំងឡើង ពិសេសការវាយប្រហារទៅលើក្រុមបះបោរពីសំណាក់ទាហានរដ្ឋាភិបាលស៊ីរី ។ ហេតុការណ៍វាយប្រហារកើតឡើងនៅទីតាំងក្បែរមណ្ឌលកម្សាន្ដរបស់កុមារ បណ្ដាលឱ្យកុមារជាច្រើននាក់បាត់បង់ជីវិតផងដែរ ។
លោក Mohammed Abu-Nasr អ្នកគាំទ្រក្រុមប្រឆាំងនៅទីក្រុងអាឡិបប៉ូ បានឱ្យដឹងថា ហេតុការណ៍វាយប្រហារគ្រាប់បែកអត្ដឃាតកើតឡើងចំពេលដែលក្រុមប្រឆាំង គ្រោងធ្វើមហាបាតុកម្មគ្រប់ទិសទីនៅក្នុងទីក្រុងនេះក្រោយពិធី បន់ស្រន់កាលពីថ្ងៃសុក្របានបញ្ចប់ទៅ។ បណ្ដាញទូរទស្សន៍ជាតិស៊ីរី បានចោទប្រកាន់ដល់ក្រុមភេរវកម្មជាអ្នកឈរពីក្រោយខ្នងនៃការ វាយប្រហារនោះ ។
ការវាយប្រហារទៅលើទីតាំងសន្ដិសុខ របស់រដ្ឋាភិបាលស៊ីរី បានបង្ហាញឱ្យឃើញថា អំពើហិង្សាកាន់តែខ្លាំងឡើងៗនៅក្នុងប្រទេសនេះអាចជម្រុញឱ្យមាន សង្គ្រាមស៊ីវិលកើតឡើងជាទ្រង់ទ្រាយធំបង្កសោកនាដកម្មកាន់តែច្រើនឡើង ដល់ពលរដ្ឋស៊ីរី ។ ចំណុចទាំងអស់នោះហើយបានធ្វើឱ្យអាមេរិកត្រៀមលក្ខណៈ ប្រើប្រាស់កម្លាំងយោធាវាយប្រហារផ្ដួលរំលំរដ្ឋាភិបាលរបស់ប្រធានាធិបតី ស៊ីរី លោកបាសា អាល់ អាសេត ៕
