តាម AFP នៅយប់ថ្ងៃទី២២ មីនា នាយខុទ្ទកាល័យ​នាយករដ្ឋមន្រ្តីជប៉ុន លោក Osamu Fajumura បានឲ្យដឹងថា កិច្ច​ចរចារ​ ៣ភាគី ចិន ជប៉ុន និងកូរ៉េខាងត្បូង​ បានឈាន​ដល់កិច្ច​ព្រមព្រៀងមួយ។
ប្រទេស​ទាំង៣នេះ បានឯកភាព​លើប្រការ​ទាំងឡាយ ស្តីពី​សន្ធិសញ្ញា​វិនិយោគទុន ដែលវាជាកក្តា​ត្រាយផ្លូវ​ សំរាប់​សន្ធិសញ្ញា​ពាណិជ្ជកម្ម​សេរី នៅថ្ងៃអនាគត។ ភាគទាំង៣ នឹងបន្ត​ប្រជុំនៅថ្ងៃទី២៨ មីនា នាក្រុង​ប៉េកាំង ប្រទេសចិន។

មេដឹកនាំ ​ទាំង៣ប្រទេស មានគំរោង​នឹង​ចុះ​កិច្ច​ព្រមព្រៀង​អំពី​វិនិយោគ​ ក្នុងជំនួប​កំពូល​ នាពាក់កណ្តាល​ខែឧសភា ឆ្នាំនេះ នៅប៉េកាំង។ ខ្លឹមសារ​នៃកិច្ច​ព្រមព្រៀង​នេះ រួមមាន​ទាំង​បញ្ហា​ការពារ​កម្មសិទ្ធិបញ្ញា ដល់​ក្រុមហ៊ុន​ជប៉ុន និង​​កូរ៉េខាងត្បូង ដែលកំពុង​រកស៊ី​នៅប្រទេសចិន។ ខឿនសេដ្ឋកិច្ច​ធំបំផុត នៃទ្វីបអាស៊ីទាំង​៣នេះ កំពុង​ស្វែងរក​វិធី​ចងសម្ព័ន្ធ​ឲ្យបាន​ខ្លាំងជាងមុន ក្នុង​បរិបថ​ដែលទីផ្សារ​អាមេរិក និង EU កំពុង​ជួបប្រទះ​ការលំបាក​ច្រើន៕