នៅយប់មេញនេះ (២៦ មីនា) សន្និសិទ​កំពូលនុយក្លេអ៊ែរ​​ បាន​ចាប់ផ្តើម​ជាផ្លូវការ​នៅកូរ៉េខាងត្បូង​ ខណៈពេល​ដែលសភាពការណ៍​កាន់តែ​តានតឹង​ បានកើតឡើងនៅអ៊ីរ៉ង់​ និងកូរ៉េខាងជើង។
ក្នុងកិច្ច​ប្រជុំ​ ២ថ្ងៃ របស់មេដឹកនាំ​របស់​ប្រទេស​ជាង ៥០ ក្នុងនោះ មានប្រធានាធិបតី​អាមេរិក ប្រមុខ​រដ្ឋចិន ប្រធានាធិបតីរុស្ស៊ី... ហើយក៏មាន​វត្តមាន​របស់មេដឹកនាំ​អង្គការ​សហប្រជាជាតិ ស្ថាប័ន​ឋាមពល​បរមាណូអន្តរជាតិ និង​ Interpol ផងដែរ។

តាម​សារព័ត៌មាន ​ Korea Times នោះ អង្គប្រជុំ​រួម នឹងប្រព្រឹត្ត​ទៅនៅថ្ងៃ​ទី២៧ មីនា ហើយ​ប្រធានាធិបតី​ម្ចាស់ផ្ទះ​ Lee Myung-bak ក៏នឹង​រៀប​ចំ​សន្និសិទ​សារព័ត៌មាន​ ដើម្បីលើកឡើង​ពី​បញ្ហាសំខាន់​ៗរបស់​អង្គប្រជុំ​។ នៅថ្ងៃដដែល​នេះ សន្និសិទ​ក៏ចេញ​សេចក្តី​ថ្លែងការណ៍​រួម​ Seoul ដើម្បី​អះអាង​ឡើងវិញ ពីកិច្ច​សន្យា​អន្តរជាតិ​ក្នុងការកាត់​បន្ថយ​ការប្រើប្រាស់​អ៊ុយរ៉ាញូម ដែលត្រូវ​បាន​បន្សុទ្ធ​ក្នុងកំរិត​ខ្ពស់ ព្រម​ជាមួយការ​បើកទូលាយ​ឲ្យមានកិច្ច​ពិភាក្សា​អពី​សុវត្ថិភាព​នុយក្លេអ៊ែរ។

ក្នុងជំនួប ​ដោយឡែក​ក្រៅ​អង្គសន្ធិសិទ​ រវាងលោក អូបាម៉ា និងលោក ហ៊ូ ចិនតាវ តាមស៊ីនហួរ​ឲ្យដឹងថា លោក ហ៊ូ​ បាននិយាយពី​កូរ៉េខាងជើង​ថា “ស្មុគស្មាញ​ខ្លាំង និងរំញោច” ហើយក៏បាន​អំពាវនាវ​ឲ្យគ្រប់ភាគី​ត្រូវអត់​ធ្មត់។ ក្នុងពេលនោះ AFP ដែលដកស្រង់​សម្តី​របស់មន្រ្តី​អាមេរិក​ ឲ្យ​ដឹងថា មេដឹកនាំ​ចិន បានបង្ហាញ​ពី “កង្វល់​ធ្ងន់ធ្ងរ” ចំពោះ​ផែនការ​របស់កូរ៉េខាងជើង។ រីឯលោក អូបាម៉ា វិញ បានជំរុញ​ឲ្យចិនបញ្ចុះបញ្ចូល​​កូរ៉េខាងជើង ឲ្យគោរព​អនុវត្តកិច្ចសន្យា​អន្តរជាតិ ហើយក៏បាន​បើកទ្វារ​សំរាប់​លទ្ធភាព​ឲ្យកូរ៉េខាងជើង​ចរចារ៕