ព័ត៌មានអន្តរជាតិ: ឱកាសចុងក្រោយសំរាប់ស៊ីរី

“ឱកាសចុងក្រោយសំរាប់ស៊ីរី” ជាសម្តីរបស់ប្រធានាធិបតីរុស្ស៊ី Medvedev ពេលដែលនិយាយពីកញ្ចប់ដំណោះស្រាយដែលបេសកជនពិសេសរបស់អង្គ ការសហប្រជាជាតិ និងសហព័ន្ធអារ៉ាប់ Kofi Annan បានលើកឡើងសំរាប់វិបត្តិនៅប្រទេសស៊ីរី។

AP បានដកស្រង់សម្តីរបស់ប្រធានាធិបតី Medvedev ពោលទៅកាន់លោក Kofi Annan ក្នុងជំនួបនាក្រុងម៉ូស្គូ ថាៈ យើងខ្ញុំវាយតម្លៃខ្ពស់ កិច្ចប្រឹងប្រែងរបស់លោក ហើយអះអាងថា នឹងគាំទ្រទាំងស្រុង ចំពោះបេសកជន Kofi Annan ។ ជាការឆ្លើយតប លោក Annan បានប្រកាសថាៈ ស៊ីរីបច្ចុប្បន្ន មានឱកាសរួមធ្វើការជាមួយខ្ញុំ ដើម្បីចាប់ផ្តើមដំណើរការបញ្ចប់អំពើហឹង្សាបង្ហូរឈាម អនុញ្ញាតិឲ្យមានស្នាក់ការជួយឧបត្ថម្ភសប្បុរសធម៌។

នៅថ្ងៃទី២៦ មីនា ប្រធានាធិបតី Medvedev ក៏បានប្រជុំជាមួយសមភាគី អាមេរិក អូបាម៉ា ក្រៅក្រមខ័ណ្ឌសន្និសិទកំពូលនុយក្លេអ៊ែរ នៅក្រុងសេអ៊ូល ប្រទេសកូរ៉េខាងត្បូង ហើយ AFP បានដកស្រង់សម្តីប្រធានាធិបតី អូបាម៉ា ឲ្យដឹងថា ភាគីទាំងពីរ ឯកភាពគាំទ្រកិច្ចប្រឹងប្រែងការទូត ដើម្បីបញ្ចប់ជម្លោះនៅស៊ីរី និងការយល់ព្រមធានាដល់រដ្ឋាភិបាលស្របច្បាប់មួយនៅប្រទេសនេះ៕