ហេតុការណ៍បំផ្ទុះគ្រាប់បែកអត្តឃាតបានផ្ទុះឡើងជាថ្មីនៅ ប្រទេសស៊ីរី បណ្តាលឱ្យមនុស្សយ៉ាងហោចណាស់ ១០នាក់ ស្លាប់ និងជាង២០នាក់ទៀតរងរបួស។ ប្រភពសារព័ត៌មានរដ្ឋរបស់ស៊ីរី បានឱ្យដឹងថា “នេះគឺជាអំពើរបស់ពួកភេវរករ ប៉ុន្តែ ក្រុមសកម្មជនបានចោទប្រកាន់ថា វាគឺជាអំពើរបស់រដ្ឋាភិបាល។
ហេតុការណ៍នេះ បានកើតឡើងនៅក្បែរវិហារមួយ ក្នុងតំបន់ មីដាន (Midan) បន្ទាប់ពីអគ្គលេខាធិការអង្គការសហប្រជាជាតិ លោកបាន គីមូន ធ្វើការប្រកាសព្រមានដល់រដ្ឋាភិបាល ដែលមិនបានបំពេញតាមលក្ខខណ្ឌសន្តិភាព របស់អង្គការសហប្រជាជាតិ។
តាមសេចក្តីរាយការណ៍មួយរបស់ទូរទស្សន៍រដ្ឋរបស់ស៊ីរី បានរាយការណ៍ឱ្យដឹងផងដែរថា “ជនស៊ីវិល និងកងកម្លាំងសន្តិសុខ ជាច្រើននាក់ បានស្ថិតនៅតំបន់នោះ ក្នុងពេលដែលគ្រាប់បែកបានផ្ទុះឡើង ធ្វើឱ្យមានចលនាយ៉ាងខ្លាំង ពួកគេភៀសខ្លួនចេញពីកន្លែងនោះភ្លាមៗផងដែរ”។
តាមសម្តី របស់អ្នកវិភាគហេតុការណ៍នេះ បានឱ្យដឹងថា “មូលហេតុនៃការបំផ្ទុះគ្រាប់បែកនេះ អាចនឹងមកពីរដ្ឋាភិបាល ចង់បង្វែរការចាប់អារម្មណ៍ពីភាពតានតឹងនៃការធ្វើបាតុកម្មនៅក្នុងប្រទេស”។
ដោយឡែកអ្នកនាំពាក្យរបស់ក្រសួងមហាផ្ទៃនៃប្រទេសស៊ីរី ក៏បានឱ្យដឹងដែរថា “ពួកគេនឹងប្រឆាំងយ៉ាងពេញទំហឹង ចំពោះអំពើភេរវកម្មប្រឆាំងនឹងប្រជាជនស្លូតត្រង់”។
គួរបញ្ជាក់់ដែរថា ហេតុការណ៍បំផ្ទុះគ្រាប់បែក និងវាយប្រហារដោយអាវុធកើតឡើងជាញឹកញាប់បំផុតនៅប្រទេសស៊ីវី ដោយគេបានប៉ាន់ប្រមាណថា ប្រជាជនប្រហែល៩០០០នាក់ បានស្លាប់គិតតាំងពីខែមីនា ឆ្នាំទៅមិញ ធ្វើឱ្យស្ថានការណ៍ប្រទេសនេះ នៅតែមិនទាន់ស្ងប់ទោះបីជាបណ្តាប្រទេសនានា បានលូកដៃចូលអន្តរាគមន៍ជាច្រើនដងរួចមកហើយក៏ដោយ
