ថ្ងៃទី 14 ខែឧសភា ឆ្នាំ2012, ម៉ោង 04:15 PM ប្រែសម្រួលៈ ស៊ុនហ្វាន
នេប៉ាល់ (BBC): មនុស្ស១៥នាក់ បានស្លាប់ ពេលយន្តហោះដឹកអ្នកដំណើរ ២១នាក់ ព្យាយាមចុះចតនៅព្រលានយន្តហោះមួយ នៅភាគខាងជើងប្រទេសនេប៉ាល់។
យន្តហោះធុន Dornie របស់ក្រុមហ៊ុនអាកាសចរណ៍ Agni Air ដែលផ្ទុកអ្នកដំណើរ ១៨នាក់ និងយានិក ៣នាក់ បានធ្លាក់នៅវេលាម៉ោង៩ និង៤៥នាទី (ម៉ោងក្នុងតំបន់) បន្ទាប់ពីទៅបុកកូនភ្នំមួយ ខណៈដែលព្យាយាមចុះចត នៅព្រលានយន្តហោះចមសុម (Jomsom airport)។
បើតាមសម្តីប៉ូលិស បានឲ្យដឹងថា មនុស្ស៦នាក់ ដែលនៅរស់ ត្រូវបានបញ្ជូនទៅកាន់មន្ទីរពេទ្យមួយ នៅក្រុងប៉ូខារ៉ា (Pokhara) ហើយអ្នកស្លាប់ និងរងរបួសភាគច្រើនជាជនជាតិឥណ្ឌា។
គ្រោះថ្នាក់តាមផ្លូវអាកាស បានក្លាយជារឿងធម្មតាទៅហើយ សម្រាប់ប្រទេសដែលសម្បូរទៅដោយភ្នំមួយនេះ។ ប៉ុន្តែប៉ូលិស បាននិយាយថា ខណៈដែលកើតហេតុ អាកាសធាតុល្អណាស់ ពុំមានចុះអ័ព្ទទេ ខណៈគេកំពុងធ្វើការស៊ើបអង្កេតលើករណីនេះ។
គួររំលឹកថា កាលពីឆ្នាំទៅមិញ មានមនុស្ស១៩នាក់ បានស្លាប់ នៅពេលដែលយន្តហោះមួយ បានដឹកអ្នកទេសចរ ទៅទស្សនាភ្នំហិមាល័យ នៅខាងក្រៅក្រុងខេតម៉ាន់ឌូ (Kathmandu)៕
