ព័ត៌មានអន្តរជាតិ: បញ្ហាសមុទ្រចិនខាងត្បូងៈ ហ្វីលីពីន-ចិន នៅតែបន្តតានតឹង

កាសែត The Philippine Daily Inquire ចុះផ្សាយថ្ងៃទី៩ ឧសភា ព័ត៌មានថា បណ្តានាវារបស់ចិន កំពុងរារាំងប្រជានេសាទហ្វីលីពីន ចូលទៅរុករកជលផល ក្នុងដែនកោះតាមទម្លាប់ នាកោះថ្ម Scarborough ។

នាង He Jia ក្នុងកម្មវិធីរបស់ CCTV

កាសែតខាងលលើ បានដកស្រង់របាយការណ៍របស់កងទ័ពហ្វីលីពីន ឲ្យដឹងថា ចំនួននាវាចិននៅកោះ Scarborough បានកើនដល់ចំនួន ៣៣ គ្រឿង ប្រៀបទៅនឹង ១៤ គ្រឿង កាលពីសប្តាហ៍មុន ។

ក្នុងពេលជាមួយគ្នានោះដែរ បណ្តាញព័ត៌មានរបស់ចិន ឲ្យដឹងថា ស្ថានទូតរបស់ប្រទេសនេះ ប្រចាំហ្វីលីពីន ទើបចេញសេចក្តីប្រកាសបន្ទាន់មួយ ដោយសំណូមពរដល់បុគ្គលិកបណ្តាក្រមហ៊ុន អ្នកជំនួញចិន ដែលកំពុងធ្វើការងារលើទឹកដីហ្វីលីពីន ត្រូវបង្កើនចំណាប់អារម្មណ៍ និងបំពេញកិច្ចការពារសុវត្ថិភាព ក្នុងការធ្វើដំណើរឲ្យបានល្អ ។

សេចក្តីប្រកាសនេះ ក៏បានសំណូមពរផងដែរ ដល់បុក្គលិកចិន កំពុងមានវត្តមាននៅហ្វីលីពីន ត្រូវលើកកម្ពស់ស្មារតីយល់ដឹង បង្កើនមនះសិការ ក៏ដូចជាបំពេញល្អការធានាសុវត្ថិភាព ចំពោះមនុស្ស និងទ្រព្យសម្បត្តិ កាត់បន្ថយការដើរចេញក្រៅ ហើយបើចេញក្រៅ ត្រូវមានអ្នករួមដំណើរ ពេលជួបហ្វូងបាតុករ ត្រូវដើរវាងចេញ មិនចូលរួម ឬ មិនឈរមើល ។

ទំនាក់ទំនង រវាងប្រទេសទាំងពីរ ដែលកំពុងតានតឹងត្រូវបានបន្ថែមទម្ងន់ គ្រាដែលអ្នកដឹកនាំកម្មវិធីព័ត៌មានរបស់ស្ថានីយ៍ទូរទស្សន៍កណ្តាលរបស់ ចិន CCTV ថ្មីៗនេះ បាន "ជ្រុលមាត់" ប្រកាសថា ហ្វីលីពីន ជាផ្នែកមួយនៃបូរណៈភាពដែនដីរបស់ចិន ។ នេះជាការធ្វេសប្រហែស នាំមកនូវឧបសគ្គពិបាកដោះស្រាយ ព្រោះរវាងប្រទេសទាំងពីរ កំពុងមានទំនាស់ដែនដីកោះ ។

តាម AFP នាង HeJia ដែលកំពុងដឹកនាំកម្មវិធីទូរទស្សន៍នៅយប់ថ្ងៃទី៧ ឧសភា (ហើយបន្ទាប់មកត្រូវបានផ្សាយឡើងវិញ លើគេហទំព័ររបស់ CCTV បាននិយាយថាៈ យើងទាំងអស់គ្នា ដឹងហើយថា ហ្វីលីពីន ជាផ្នែកដែនដីបូរុមបូរាណរបស់ចិន ហើយហ្វីលីពីន ចំណុះអធិបតេយ្យភាពចិន ។ វាជាការពិតដែលមិនអាចជជែកវែកញែកបាន ។

មេដឹកនាំ CCTV បានបដិសេធ មិនមានយោបល់អ្វីពីការជ្រុលជ្រោះនេះ ហើយក៏មិនបានបញ្ជាក់ថា ស្ថានីយ៍ទូរទស្សន៍នឹងសុំទោសដែរ ឬ អត់ ៕