- Monday, 07 May 2012 01:32
នៅវេលាយប់ម្សិលមិញនេះ (៦ ឧសភា) តាមលទ្ធផលដែលក្រសួងមហាផ្ទៃបារាំង បានរាប់ និងប្រកាសជំហានដំបូង ឲ្យដឹងថា លោក Francois Hollande ទទួលបានសម្លេងគាំទ្រ ៥១,០៥% ខណៈពេលដែលគូប្រជែងរបស់លោកក្នុងជុំទី២ គឺប្រធានាធិបតីបារាំងកំពុងកាន់អំណាច Nicolas Sarkozy ទទួលបានតែ ៤៨,៩៥% ។
តាមគំរោងលទ្ធផលផ្លូវការ នឹងត្រូវបានក្រុមប្រឹក្សាធម្មនុញ្ញប្រកាសនៅដើមសប្តាហ៍ក្រោយ ។
ដូច្នេះ ជាមួយនឹងលទ្ធផលខាងលើ វាជាលើកដំបូងហើយ ដែលគណបក្សនិយមធ្វេង ឡើងកាន់អំណាចក្រោយអវត្តមាន ១៧ឆ្នាំ កន្លងមក ។ ប្រទេសបារាំងនឹងមានមេដឹកនាំគណបក្សសង្គម ឡើងកាន់អំណាច ដែលមុននេះ ធ្លាប់បានទទួលតំណែងប្រធានាធិបតីដែរ គឺលោក Francois Mitterrand ។
ស្របពេលនឹងគ្នានោះ លោក Sarkozy បានក្លាយជាប្រធានាធិបតីដំបូងមួយរូប របស់បារាំង ដែលកាន់អំណាចបានតែ១អណត្តិ គិតពីឆ្នាំ១៩៨១ មក ហើយលោកក៏ជាប្រធានាធិបតីទី១១ របស់ទ្វីពអឺរ៉ុប ដែលធ្លាក់ឆ្នោតដោយឥទ្ធិពលនៃវិបត្តិ សេដ្ឋកិច្ចអឺរ៉ុប ។
ក្រោយ ការប្រកាសលទ្ធផល ភ្លាមៗនោះ អ្នកគាំទ្ររបស់លោក Hollande រាប់ពាន់នាក់ បានប្រមូលផ្តុំគ្នានៅទីលានប្រវត្តិសាស្ត្រ Bastillo កណ្តាលក្រុងប៉ារីស ដើម្បីរបបជ័យជំនះ ។
ខណៈពេលដដែលនោះ លោក Sarkozy ក៏បានទទួលស្គាល់បរាជ័យ ហើយទូរស័ព្ទជូនពរមេដឹកនាំថ្មីរបស់ប្រទេសបារាំង ។
សំដែង មតិជាមួយអ្នកគាំទ្រខ្លួន លោក Sarkozy ពោលថាៈ ពលរដ្ឋបារាំងមានការជ្រើសរើសរបស់ខ្លួន... Francois Hollande ជាប្រធានាធិបតីរបស់ប្រទេសបារាំង ហើយលោកចាំបាច់ត្រូវបានគោរព... ខ្ញុំទទួលខុសត្រូវចំពោះបរាជ័យនេះ ។ លោកក៏បានថ្លែងអំណរគុណផងដែរ ចំពោះអ្នកប្រឹងប្រែងគាំទ្រ ៕
