- Saturday, 04 August 2012 10:04
សហរដ្ឋអាមេរិក កាលពីថ្ងៃសុក្របានធ្វើការរិះគន់ចំពោះការបង្កើត មូលដ្ឋានទ័ពថ្មីមួយរបស់ចិននៅក្នុងសមុទ្រចិនខាងត្បូង ស្របពេលដែលខ្លួនបានអំពាវនាវឲ្យគ្រប់ភាគីទាំងអស់បន្ថូរបន្ថយភាព តានតឹងនៅក្នុងសមុទ្រដែលមានជម្លោះដ៏ក្តៅកគុក ។ចិនកាលពី សប្តាហ៍មុនបានប្រកាសថាខ្លួនបានបង្កើតទីក្រុងតូចមួយឈ្មោះសានសា និង មូលដ្ឋានទ័ពនៅលើកោះមួយក្នុងប្រជុំកោះផារ៉ាសែល ដោយធ្វើឲ្យវៀតណាម និង ហ្វីលីពីនដែលចោទប្រកាន់ចិនថាបានធ្វើការគំរាមកំហែងនោះ ខឹងសម្បាយ៉ាងខ្លាំង ។
អ្នកនាំពាក្យក្រសួងការបរទេសអាមេរិក លោក ផាទ្រីក វ៉េនត្រេល បាននិយាយនៅក្នុងសេចក្តីថ្លែងការណ៍មួយថា "យើងមានការព្រួយបារម្ភដោយសារការកើនឡើងភាពតានតឹងនៅក្នុងសមុទ្រចិន ខាងត្បូង និង បាននិងកំពុងតាមដានសភាពការណ៍យ៉ាងយកចិត្តទុកដាក់" ។
លោកនិយាយថា "ជាពិសេស ការបន្ថែមកំរិតរដ្ឋបាលនៃទីក្រុងសានសារបស់ចិន និង ការបង្កើតមូលដ្ឋានយោធាថ្មីមួយនៅទីនោះដោយគ្របដណ្តប់លើតំបន់សមុទ្រ ចិនខាងត្បូងដែលមានជម្លោះគឺផ្ទុយនឹងកិច្ចប្រឹងប្រែងផ្នែកការទូត ប្រកបដោយកិច្ចសហប្រតិបត្តិការដើម្បីដោះស្រាយការខ្វែងគំនិតគ្នា និង ហានិភ័យនានាកុំឲ្យរីករាយដាលខ្លាំងឡើងនៅក្នុងតំបន់" ។
លោកវ៉េនត្រេលក៏បានលើកឡើងពី "ជម្លោះពាក្យសម្តី" និង ឧបត្តិហេតុមួយចំនួននៅសមុទ្រចិនខាងត្បូងផងដែរ ដោយលោកនិយាយថា "សហរដ្ឋអាមេរិកសូមជម្រុញឲ្យភាគីទាំងអស់ចាត់វិធានការនានាដើម្បី សម្រាលភាព តានតឹង" ។
លោកវ៉េនត្រេលក៏បានលើកឡើងម្តងទៀតថា សហរដ្ឋអាមេរិកមានផលប្រយោជន៍ពីស្ថេរភាព និង "ពាណិជ្ជកម្មស្របតាមច្បាប់ដោយគ្មានការរំខាន" នៅក្នុងសមុទ្រចិនខាងត្បូង ប៉ុន្តែរដ្ឋាភិបាលក្រុងវ៉ាស៊ីនតោននឹងមិនឈរខាងគូជម្លោះណាមួយនោះទេ ។
ក្រៅពីជម្លោះនៅសមុទ្រចិនខាងត្បូង ប្រទេសចិនក៏មានជម្លោះដាច់ដោយឡែកមួយទៀតផងដែរជាមួយសម្ព័ន្ធមិត្ត អាមេរិកគឺប្រទេសជប៉ុននៅសមុទ្រចិនខាងកើត ។ ហើយបន្ទាប់មករដ្ឋមន្ត្រីការពារជាតិជប៉ុនលោក សាតូស៊ី ម៉ូរីមូតុ ក៏បានទៅពិភាក្សាជាមួយរដ្ឋមន្ត្រីការពារជាតិអាមេរិកនៅក្រុង វ៉ាស៊ីនតោនកាលពីថ្ងៃសុក្រ ។
រដ្ឋមន្ត្រីការពារជាតិអាមេរិក លោក ឡេអន ផាណេតា ដែលចេញមកថ្លែងក្នុងសន្និសិទកាសែតរួមគ្នាជាមួយលោកម៉ូរីមូតុ បានធ្វើការកើតសរសើរអាស៊ានចំពោះការធ្វើការលើក្រមប្រតិបត្តិសម្រាប់ សមុទ្រចិនខាងត្បូង និង បានអំពាវនាវឲ្យមានភាពជឿនលឿនថែមទៀត ។
លោកផាណេតាបាននិយាយថា "រឿងចុងក្រោយដែលយើងចង់បានគឺធ្វើឲ្យជម្លោះដោយផ្ទាល់ក្នុងសមុទ្រ ចិនខាងត្បូងអនុឡោមទៅតាមបញ្ហាផ្លូវច្បាប់ ។ បញ្ហាជម្លោះទាំងនោះគួរតែត្រូវដោះស្រាយដោយសន្តិវិធី ហើយជម្លោះគួរតែត្រូវដោះស្រាយដោយអនុឡោមតាមក្រមប្រតិបត្តិ ។ ហើយសហរដ្ឋអាមេរិកនឹងធ្វើគ្រប់អ្វីៗទាំងអស់ដែលយើងអាចធ្វើទៅបាន ដើម្បីធ្វើការជាមួយជប៉ុន និង ប្រទេសដទៃទៀតដើម្បីធានាថានេះគឺជាវិធីសាស្ត្រដែលយើងអនុវត្ត" ៕ ប្រភពព័ត៌មាន : CEN
