ថ្ងៃទី 07 ខែឧសភា ឆ្នាំ2013, ម៉ោង 10:41 PM ប្រែសម្រួលៈ ស៊ុនហ្វាន
កូរ៉េ (BBC) : ប្រទេសកូរ៉េខាងជើង បានចល័តកាំជ្រួចផ្លោងធុនមធ្យម ២ដើម ពីតំបន់ឆ្នេរមួយ ដែលឥរិយាបថថ្មីនេះ ត្រូវមន្ត្រីអាមេរិកនិយាយថា ជាការកាត់បន្ថយសភាពតានតឹងមួយ នៅជ្រោយកូរ៉េ។
ក្រុងព្យុងយ៉ាង បានដាក់ពង្រាយកាំជ្រួចនេះ កាលពីខែមុន និងបានគំរាមថា នឹងបើកការវាយប្រហារមួយ នៅក្នុងតំបន់ បន្ទាប់ពីអង្គការសហប្រជាជាតិបានដាក់ទណ្ឌកម្មថ្មី លើប្រទេសកូរ៉េខាងជើង ក្រោយពីប្រទេសនេះ បានធ្វើការសាកល្បងអាវុធបរមាណូ ជាលើកទី៣ កាលពីខែមីនា ។
កូរ៉េខាងជើង បានសម្តែងការខឹងសម្បារ ចំពោះធ្វើសមយុទ្ធយោធា របស់អាមេរិក និងកូរ៉េខាងត្បូង ដែលបានបញ្ចប់កាលពីសប្តាហ៍មុន ។
ព័ត៌មានស្តីពីការចល័តអាវុធមហាប្រល័យ ពីឆ្នេរខាងកើតនេះ បានបែកធ្លាយ ស្របពេលដែលមានជំនួបកំពូលរវាងប្រធានាធិបតីអាមេរិក និងកូរ៉េខាងជើង ។ លោកស្រីផាក គិនហេ បានជួបចរចា ជាមួយសមភាគី លោកបារ៉ាក់ អូបាម៉ា នៅថ្ងៃអង្គារ ដែលគេជឿថា ភាគីទាំងពីរ បានសន្យាពង្រឹងទំនាក់ទំនងប្រទេសទាំងពីរមួយកម្រិតទៀត ។ លោកស្រីគិនហេ នឹងថ្លែងទៅកាន់សភាអាមេរិក នៅថ្ងៃពុធ ។
ទាក់ទិននឹងការចល័តនេះ លោកចច លីតថល(George Little) អ្នកនាំពាក្យទីស្តីការក្រសួងការេពារជាតិអាមេរិក មិនបានបកស្រាយឱ្យចប់ចំណុចគោលដៅ តែលោកបានប្រាប់អ្នកសារព័ត៌មានថា “នេះជាជំហានថ្មីមួយ ដែលយើងជឿថា នឹងធ្វើឱ្យមានសន្តិភាព និងស្ថិរភាព នៅជ្រោយកូរ៉េ "៕akt
