ថ្ងៃទី 30 ខែឧសភា ឆ្នាំ2013, ម៉ោង 12:40 AM ប្រែសម្រួលៈ ស៊ុនហ្វាន
ប៉ាគីស្ថាន (BBC) : មេបញ្ជាការលំដាប់ទី២ របស់ក្រុមតាលីបង់-ប៉ាគីស្ថាន ត្រូវបានសម្លាប់ ក្នុងហេតុការណ៍មួយ ដែលគេសង្ស័យថា ត្រូវយន្តហោះគ្មានយានិកអាមេរិក វាយប្រហារ នេះបើតាមប្រភពពីមន្ត្រីជាន់ខ្ពស់តាលីបង់។
ប្រភពពីមន្ត្រីតាលីបង់ នៅមីរ៉ានសា (Miranshah) បានប្រាប់BBC ថា លោកវ៉ាលៀ រ៉េម៉ាន់(Waliur Rehman) ដែលជាមេបញ្ជាការលំដាប់លេខ២ នៃក្រុមតាលីបង់ ប៉ាគីស្ថាន ត្រូវបាន សម្លាប់ ក្នុងប្រតិបត្តិការវាយប្រហារ តាមអាកាសមួយ ដោយយន្តហោះគ្មានយានិកអាមេរិក។
ព័ត៌មាននេះ ស្របគ្នា នឹងព័ត៌មាន មុននេះ ដែលយោងតាមសម្តីក្រុមមន្ត្រីសន្តិសុខប៉ាគីស្ថាន ដែលអះអាងថា មេបញ្ជាការក្រុមតាលីបង់ ក្នុងតំបន់ម្នាក់ ត្រូវបានសម្លាប់ នៅក្រុងមីរ៉ាន់សា នៅភាគឦសានប៉ាគីស្ថាន កាលពីព្រលឹមថ្ងៃពុធ។
ប្រតិបត្តិការនេះ កើតឡើង នៅរយៈពេល១សប្តាហ៍ ក្រោយពីលោកប្រធានាធិបតីអាមេរិក បារ៉ាក់ អូបាម៉ា (Barack Obama) បានលើកឡើងនូវវិធានការបង្កើនប្រតិបត្តិការវាយប្រហារតាមយន្តហោះគ្មានយានិក នៅតំបន់គោលដៅនានា។
អាមេរិក បានផ្តល់ប្រាក់ចំនួន ៥លានដុល្លារ ដល់ជនណា ដែលអាចផ្តល់ព័ត៌មានពីមេបញ្ជាការរូបនោះ ដោយបានចោទប្រកាន់លោកវ៉ាលៀ ថាបានចាំប់ពាក់ព័ន្ធនឹងការវាយប្រហារលើកងកម្លាំងពហុជាតិសាសន៍ នៅអាហ្វហ្គានីស្ថាន ដែលករណីនេះ រួមទាំងការបំផ្ទុះគ្រាប់បែកនៅឆ្នាំ២០០៩ នៅមូលដ្ឋានអាមេរិក ដែលបានផ្តាច់ជីវិតមន្ត្រីCIA ៧នាក់ផងដែរ។akt
