ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ០៨:០៥
ទូរទស្សន៍រដ្ឋអេហ្ស៊ីបរាយការណ៍ថា មនុស្សយ៉ាងតិច៣៨៨នាក់ បានត្រូវរបួសក្នុងការប៉ះទង្គិចគ្នានានារវាងកងកម្លាំងសន្តិសុខ អេហ្ស៊ីប និងពួកបាតុករ កាលពីយប់ថ្ងៃទី២ កុម្ភៈ នៅជិតទីស្នាក់ការក្រសួងមហាផ្ទៃកណ្តាលទីក្រុងគែរ។ កងកម្លាំងសន្តិសុខបានប្រើប្រាស់ឧស្ម័នបង្ហូរទឹកភ្នែក ដើម្បីបំបែកពួកអ្នកគាំទ្របាល់ទាត់ដែលលើកមកជួបគ្នាជាមួ យពួកបាតុករដទៃៗ ទៀត ដើម្បីសំដៅពីសាមគ្គីភាពរបស់ពួកគេជាមួយបណ្តាគ្រួសារជនរងគ្រោះ និងដើម្បីរារាំងបាតុករកុំឱ្យលុកចូលដល់អគារក្រសួងនេះ។
បាតុកម្មបានផ្ទុះឡើងបន្ទាប់ពីការបះបោរ រវាងពួកអ្នកគាំទ្រក្រុមបាល់ទាត់ AL MASRY និងពួកអ្នកគាំទ្រក្រុមបាល់ទាត់ក្លឹប AL AHLY CLUB ក្រោយការប្រកួតរវាងក្រុមទាំង២នៅទីក្រុង PORT SAÏD ដែលបណ្តាលឱ្យមនុស្សស្លាប់៧៤នាក់ ហើយជាច្រើនរយនាក់ត្រូវរបួស កាលពីយប់ថ្ងៃទី១ កុម្ភៈ។ ពួកបាតុករយល់ថា ប៉ូលិសជាអ្នកទទួលខុសត្រូវលើសោកនាដកម្មនៅ PORT SAÏD នេះ ពីព្រោះតែប៉ូលិសបណ្តោយឱ្យពួកអ្នកគាំទ្របាល់ទាត់ចូលក្នុងស្តាត ជាមួយដុំថ្ម និងកាំបិត។
នាយករដ្ឋមន្ត្រីអេហ្ស៊ីប លោកកាម៉ាស់ អាល់ហ្គានហ្សូរី កាលពីថ្ងៃទី២ កុម្ភៈ បានដកតំណែងអភិបាលក្រុង PORT SAÏD ហើយប្រមុខសន្តិសុខខេត្ត និងប្រមុខសហព័ន្ធបាល់ទាត់អេហ្ស៊ីបក៏ត្រូវបញ្ឈរជើងដែរ ។ យោងតាមទូរទស្សន៍រដ្ឋថា ការប៉ះទង្គិចគ្នារវាងពួកបាតុករ និងប៉ូលិសក៏កើតមានដែរនៅតំបន់ស៊ុយអេនាថ្ងៃជាមួយគ្នានេះ ៕
