ថ្ងៃសុក្រ ទី៣ ខែកុម្ភៈ ឆ្នាំ២០១២ ម៉ោង ០៨:១៥
នាយករដ្ឋមន្ត្រីចិន លោកវេន ជាបាវ អះអាងជាថ្មីកាលពីថ្ងៃទី២ កុម្ភៈ ថា ប្រទេសចិនយល់ថា ការចរចា និងកិច្ចសហប្រតិបត្តិការគឺជាដំណោះស្រាយដែលមានប្រសិទ្ធភាព តែមួយគត់ ដើម្បីដោះស្រាយបញ្ហានុយក្លេអ៊ែរអ៊ីរ៉ង់ ដោយលោកបន្តថា ទណ្ឌកម្មនឹងពុំអាចផ្តល់ចម្លើយចំពោះបញ្ហានេះឡើយ ។ លោកវេន ជាបាវ អះអាងបែបនេះ ក្នុងឱកាសនៃសន្និសីទសារព័ត៌មានរួមគ្នាមួយជាមួយ អធិការបតីអាល្លឺម៉ង់ លោកស្រីអេន ចឺឡាម័រកែល នៅទីក្រុងប៉េកាំង។
លោកវេន ជាបាវ បញ្ជាក់ថា ប្រទេសចិនថែរក្សាយ៉ាងម៉ឺងម៉ាត់ដល់របបអន្តរជាតិនៃការ មិនសាយភាយនុយក្លេអ៊ែរ ហើយប្រឆាំងនឹងអ៊ីរ៉ង់ និងគ្រប់ប្រទេសនៅមជ្ឈិមបូព៌ាដែលចង់ផលិតអាវុធនុយក្ហេអ៊ែរ។ លោកបន្តថា បញ្ហានុយក្លេអ៊ែរអ៊ីរ៉ង់គឺស្មុគ្រស្មាញ និងរសើប ហើយទាក់ទិនដល់សន្តិភាព សន្តិសុខ និងស្ថេរភាពក្នុងតំបន់ និងលើពិភពលោក ។ លោកបញ្ជាក់ថា ការប្រើប្រាស់កម្លាំងនឹងបង្កឱ្យមានការវឹកវរ និងការបះបោរនៅមជ្ឈិមបូព៌ា និងលើពិភពលោក ដែលនឹងអាចធ្វើឱ្យមានការខូចខាតសម្រាប់គ្រប់ភាគីទាំងអស់ ។
ចិនធ្វើការជានិច្ចដើម្បីជំរុញការចរចា រវាងអ៊ីរ៉ង់ និងប្រទេសទាំង៥ ជាសមាជិកអចិន្ត្រៃយ៍ក្រុមប្រឹក្សាសន្តិសុខ អ.ស.ប រួមនឹងអាល្លឺម៉ង់។ ចិនក៏អំពាវនាវផងដែរដល់អ៊ីរ៉ង់ឱ្យពង្រឹងកិច្ចសហ ប្រតិបត្តិការជាមួយទីភ្នាក់ងារថាមពលបរមាណូអន្តរជាតិ។ យោងតាមនាយករដ្ឋមន្ត្រីចិនថា ចិនរក្សាទំនាក់ទំនងពាណិជ្ជកម្មធម្មតាជាមួយអ៊ីរ៉ង់ ជាពិសេសក្នុងពាណិជ្ជកម្មប្រេងឆៅ ហើយនឹងពុំប្រឆាំងចំពោះបណ្តាច្បាប់អន្តរជាតិ និងដំណោះស្រាយទាំងឡាយរបស់ក្រុមប្រឹក្សាសន្តិសុខ អ.ស.ប ឡើយ ៕
