ដោយ ៖ សាធី
ថ្ងៃទី 01-02-2012 ម៉ោង 14:03:08 សារព័ត៌មាន រ៉យទ័របានផ្សព្វផ្សាយថា អង្គការសហប្រជាជាតិបានប្រកាសអាសន្នពីកង្វះស្បៀងអាហារ ថាមពល ទឹកស្អាត គួបផ្សំជាមួយគ្រោះធម្មជាតិអាចបណ្ដាលឱ្យមនុស្ស៣ពាន់លាននាក់ ធ្លាក់ក្នុងសភាពក្រីក្រ ។
តាមការប៉ាន់ប្រមាណរបស់ អង្គការសហប្រជាជាតិដល់ឆ្នាំ២០៣០ ទិន្នផលស្បៀងអាហារនៅលើពិភពលោកចាំបាច់ត្រូវកើនឡើងប្រមាណ៥០ភាគរយ ថាមពលត្រូវកើនឡើង៤៥ភាគរយ និងទឹកស្អាតកើនឡើង៣០ភាគរយទើបអាចបំពេញតាមតម្រូវការប្រើប្រាស់ របស់ពលរដ្ឋជាង៧ពាន់លាននាក់ ។
តាមរបាយការណ៍របស់ អង្គការសហប្រជាជាតិបានឱ្យដឹងថា រូបមន្ដអភិវឌ្ឍន៍នៅលើពិភពលោកនាពេលបច្ចុប្បន្មគ្មានលំនឹងដោយ ប្រទេសជាច្រើនពឹងផ្អែកលើប្រភពធនធានធម្មជាតិដែលកាន់តែរីងស្ងួតពី មួយថ្ងៃទៅមួយថ្ងៃដើម្បីអភិវឌ្ឍន៍ប្រទេសជាតិ ហើយការរីងស្ងួតរិចរិលនៃប្រភពធនធាននោះនឹងបង្កគ្រោះថ្នាក់ យ៉ាងធ្ងន់ធ្ងរដល់ពិភពលោកទាំងមូល ។ ចាប់តាំងពីឆ្នាំ២០០០មកទល់ពេលនេះមានពលរដ្ឋ២០នាក់នៅលើពិភពលោក ខ្វះអាហារូបត្ថម្ភ ។ ព្រៃឈើ៥,២លានហិកតាត្រូវរងការបំផ្លិចបំផ្លាញជារៀងរាល់ឆ្នាំ ។ ៨៥ភាគរយនៃធនធានមច្ឆារក៏បានបាត់បង់ ហើយអ្វីដែលត្រូវព្រួយបារម្ភខ្លាំងបំផុតនោះគឺកម្រិតនៃឧស្ម័នពុល កាបូនឌីអុកស៊ីត កើនឡើង៣៨ភាគរយប្រៀបធៀបនឹងឆ្នាំ១៩៩០ ។
ក្នុងពេលជាមួយគ្នានោះដែរ អង្គការយូនីសេហ្វបានស្នើឱ្យផ្ដល់ជំនួយមូលនិធិជាទឹកប្រាក់ ប្រមាណ៣ពាន់លានដុល្លារសម្រាប់ជួយដល់កុមារក្នុងឆ្នាំ២០១២នេះ ។
កាលពីថ្ងៃទី៣១ មករា មូលនិធិកុមារអន្ដរជាតិយូនីសេហ្វ បានអំពាវនាវដល់សហគមន៍អន្ដរជាតិផ្ដល់ជំនួយជាទឹកប្រាក់១,៣ពាន់លាន ដុល្លារដើម្បីផ្ដល់ជំនួយមនុស្សធម៌ដល់កុមារនៅទូទាំងពិភពលោកនា ឆ្នាំ២០១២ ពិសេសកុមារនៅ២៥ប្រទេសដែលរងឥទ្ធិពលយ៉ាងធ្ងន់ធ្ងរពីគ្រោះមហន្ដរាយ ធម្មជាតិ និងសង្គ្រាមស៊ីវិល ។
តាមរបាយការណ៍ស្ដីពីសកម្មភាព មនុស្សធម៌សម្រាប់កុមារនៅឆ្នាំ២០១២ យូនីសេហ្វបានលើកឡើងពីលទ្ធផលជាវិជ្ជមានក្នុងការផ្ដល់ជំនួយជា បន្ទាន់ដល់កុមារនៅឆ្នាំ២០១១ ។ ប៉ុន្ដែតម្រូវការជំនួយមនុស្សធម៌ទ្រង់ទ្រាយធំ និងយូរអង្វែងសម្រាប់កុមាររាប់លាននាក់ក្នុងឆ្នាំ២០១២ជាបន្ដទៀត ។ តំបន់អាហ្វ្រិក កុមារជាច្រើនកំពុងប្រឈមនឹងគ្រោះទុរភិក្ស ។ ពលរដ្ឋប៉ាគីស្ថានជាង៥លាននាក់បន្ដរងឥទ្ធិពលឆ្នាំទី២បណ្ដាលមក ពីគ្រោះទឹកជំនន់ជាប្រវត្ដិសាស្ដ្រ ។ សកម្មភាពជួយដល់កុមារហៃទីក្រោយគ្រោះមហន្ដរាយធម្មជាតិរញ្ជួយដ៏ ធ្ងន់ធ្ងរបំផុតកាលពី២ឆ្នាំមុន ក៏ដូចជាតម្រូវការជំនួយមនុស្សធម៌ជាច្រើនទៀតនៅមជ្ឈិមបូព៌ា និងអាហ្វ្រិកខាងជើងដោយសារតែវិបត្ដិនយោបាយ ។
យូនីសេហ្វកំពុងតែធ្វើសកម្មភាព ផ្ដល់ជំនួយជាបន្ទាន់ជួយស្រោចស្រង់អាយុជីវិតកុមារ និងស្ដ្រីរាប់សែននាក់នៅទ្វីបអាហ្វ្រិកដូចជា សាធារណរដ្ឋកុងហ្គោ អាហ្វ្រិកកណ្ដាល ស៊ូដង់ខាងត្បូង និងកូឌីវ័រ... ។
អគ្គនាយកយូនីសេហ្វលោកស្រី Anthony Lake បានបញ្ជាក់ថា តម្រូវការមនុស្សធម៌ជាបន្ទាន់ និងយូរអង្វែងសម្រាប់កុមាររាប់លាននាក់ដែលកំពុងរស់នៅក្នុងតំបន់ ដែលមានវិវាទជាច្រើនឆ្នាំកន្លងមក ។ មិនត្រឹមតែប៉ុណ្ណោះជំងឺតម្កាត់ក៏បានគំរាមកំហែងដល់អាយុជីវិតកុមារ រាប់លាននាក់ទៀតផង ។ នៅឆ្នាំ២០១១ យូនីសេហ្វបានជួយផ្គត់ផ្គង់សម្ភារចាំបាច់សម្រាប់ការសិក្សាដល់ កុមារហៃទីជាង១សែននាក់ ។ តាមប្រសាសន៍របស់លោកស្រីឱ្យដឹងថា កុមាររាប់លាននាក់នៅលើពិភពលោកងាយស្រួលរងផលប៉ះពាល់ត្រូវការជំនួយ មនុស្សធម៌ជាបន្ទាន់ដើម្បីស្ថិតស្ថេរលើភពផែនដី បញ្ចៀសជំងឺតម្កាត់ និងតម្រូវការសិក្សារៀនសូត្រ ។
បម្រែបម្រួលអាកាសធាតុបណ្ដាលមកពី ការបំផ្លិចបំផ្លាញធនធានធម្មជាតិនៅលើពិភពលោកបង្កឱ្យមានគ្រោះ មហន្ដរាយធម្មជាតិជាច្រើនបានកើតឡើងនៅជុំវិញពិភពលោក ។
ប្រទេសមួយចំនួនមិនទាន់ងើបឡើង វិញក្រោយគ្រោះធម្មជាតិបំផ្លាញដូចជា ហៃទី ប៉ាគីស្ថាន និងប្រទេសជាច្រើនទៀត ក៏ស្រាប់តែមានគ្រោះធម្មជាតិថ្មីៗវាយប្រហារដោយចៃដន្យ ធ្វើឱ្យពលរដ្ឋមិនបានត្រៀមលក្ខណៈទប់ទល់បានល្អប្រសើរ ។
គ្រាន់តែនៅដើមឆ្នាំ២០១២ មានគ្រោះធម្មជាតិជាច្រើនបានកើតឡើងនៅជុំវិញពិភពលោកបំផ្លាញ ទ្រព្យសម្បត្ដិ និងអាយុជីវិតយ៉ាងច្រើន ។
ភ្លៀងធ្លាក់ខ្លាំងអូសបន្លាយជា ច្រើនថ្ងៃនៅតំបន់ភ្នំ Argopuro ភាគខាងកើតកោះចាវ៉ា ប្រទេសឥណ្ឌូនេស៊ី ធ្វើឱ្យកម្រិតទឹកតាមដងទន្លេកើនឡើងខ្ពស់ លិចច្រាំងបង្កជាទឹកជំនន់ពន្លិចផ្ទៃដីទ្រង់ទ្រាយធំ បណ្ដាលឱ្យមនុស្ស៦នាក់បាត់ខ្លួន និងខាតបង់ទឹកប្រាក់រាប់លានដុល្លារ ។
ក្រសួងគ្រប់គ្រង និងកាត់បន្ថយគ្រោះមហន្ដរាយធម្មជាតិឥណ្ឌូនេស៊ី បានឱ្យដឹងថា ទឹកជំនន់បានកើតឡើងដោយចៃដន្យ ធ្វើឱ្យពលរដ្ឋក្នុងតំបន់មិនអាចត្រៀមលក្ខណៈទប់ទល់ទាន់ពេលវេលា ។ ផ្ទះរាប់ពាន់ខ្នងត្រូវបានបំផ្លាញ សត្វចិញ្ចឹមជាច្រើនត្រូវទឹកជំនន់កួចទៅបាត់។ ទឹកជំនន់បានបំផ្លាញទីសាធារណជាច្រើន ដូចសាលារៀន ប្រព័ន្ធចរាចរណ៍តភ្ជាប់ ពីតំបន់មួយទៅតំបន់មួយ ។ ពេលនេះ ក្រុមជួយសង្គ្រោះ និងកម្លាំងទាហាន បានទៅដល់កន្លែងរងគ្រោះធ្ងន់ធ្ងរជួយ ដល់ប្រជាពលរដ្ឋ ។
ក្នុងពេលនោះដែរពលរដ្ឋនៅប្រទេស ជាច្រើននៅតំបន់អឺរ៉ុបខាងកើតដូចជា អ៊ុយក្រែន ប៉ូឡូញ ប៊ុលហ្គារី... កំពុងប្រឈមមុខនឹងអាកាសធាតុត្រជាក់ខុសប្រក្រតី ។ ព្រិលធ្លាក់យ៉ាងក្រាស់នៅប៉ុន្មានថ្ងៃចុងខែមករានេះបណ្ដាលឱ្យមាន អ្នកស្លាប់៣៦នាក់ ។ សាលារៀនជាច្រើនត្រូវបិទទ្វារ ចរាចរមានការកកស្ទះ ហើយតំបន់មួយចំនួនគ្មានអគ្គិសនីប្រើប្រាស់ទៀតផង ។
តាមសេចក្ដីប្រកាសនៅថ្ងៃទី៣០-៣១ មករា តំបន់ជាច្រើនមានសីតុណ្ហភាពធ្លាក់ចុះរហូតដល់-២០អង្សាសេ ។ មន្ដ្រីទទួលខុសត្រូវបានជម្លៀសពលរដ្ឋទៅកាន់តំបន់មានសុវត្ថិភាព និងផ្គត់ផ្គង់ស្បៀងអាហារ ថាមពលសម្រាប់ដុតកម្ដៅ ។
ដោយឡែកនៅក្នុងប្រទេសប៉េរូមាន គ្រោះរញ្ជួយដីកម្រិត៦,២រ៉ិចទ័រនៅតំបន់ភាគកណ្ដាលប្រទេសនេះ បណ្ដាលឱ្យមនុស្ស១២៣នាក់រងរបួស ។ តាមមន្ដ្រីប៉េរូបានបញ្ជាក់ថា អ្នកដែលរងរបួសទាំងនោះអាចនឹងចាកចេញពីមន្ទីរពេទ្យនាពេលឆាប់ៗ ដោយសារតែរបួសសើរស្បែកប៉ុណ្ណោះ ។ តែការរញ្ជួយដីនោះក៏បានបំផ្លាញផ្ទះ៥៣ខ្នងផងដែរ ហើយកាត់ផ្ដាច់ប្រព័ន្ធទំនាក់ទំនងជាច្រើនម៉ោង ។ តាមក្រុមផែនដីវិទ្យាប៉េរូបានបញ្ជាក់ថា ការរញ្ជួយដីនោះមានជម្រៅ៣៥គីឡូម៉ែត្រ ។
រញ្ជួយដីកម្រិត៦,២រ៉ិចទ័រនា ពេលនេះមានលក្ខណៈធ្ងន់ធ្ងរបំផុតនៅប្រទេសអាហ្វ្រិកខាងត្បូងនា ដើមឆ្នាំ២០១២ ។ កន្លងមកកាលពីឆ្នាំ២០០៧ ប្រទេសនេះក៏រងការរញ្ជួយដីកម្រិត៨រ៉ិចទ័រផងដែរ ៕
