ដោយ ៖ សាធី
ថ្ងៃទី 23-02-2012 ម៉ោង 12:57:40 ព័ត៌មាន ស្ដីពីការស្លាប់របស់អ្នកសារ ព័ត៌មាន២រូប ដែលជាជនជាតិអង់គ្លេស និងអាមេរិក នៅក្នុងការប៉ះទង្គិចគ្នារវាង រដ្ឋាភិបាល និងក្រុមប្រឆាំងនៅទីក្រុង ហូមនាពេលកន្លងមកនេះបានធ្វើឱ្យលោកខាងលិចមានការខឹងសម្បាយ៉ាង ខ្លាំងចំពោះរដ្ឋាភិបាលស៊ីរី ។
នាង Marie Colvin ជនជាតិអាមេរិក ជាអ្នកយកព័ត៌មាននៅលើសមរភូមិដ៏ ល្បីល្បាញសម្រាប់សារព័ត៌មាន Times Sunday របស់អង់គ្លេស ។ នាង Colvin ពិការភ្នែកម្ខាងពេលយកព័ត៌មានពី សង្គ្រាមស៊ីវិលនៅស្រីលង្កា កាលពីឆ្នាំ ២០០១ ហើយនាងក៏ជាអ្នកធ្លាប់ចូលរួម យកព័ត៌មានក្នុងសង្គ្រាមអ៊ីរ៉ាក់, អាហ្វ ហ្គានីស្ថាន និងមជ្ឈិមបូព៌ាទៀតផង ។
អ្នកសារព័ត៌មានទី២ជាជនជាតិ បារាំង ឈ្មោះRemi Ochlik កើតនៅឆ្នាំ១៩៨៣ អ្នកទាំង២បានស្លាប់ពេលបម្លាស់ចេញពីផ្ទះពលរដ្ឋមួយកាលពីព្រឹក ថ្ងៃទី២១ កុម្ភៈ ខណៈរងការវាយប្រហារ ។ នោះជាផ្ទះពលរដ្ឋសាមញ្ញ ប៉ុន្ដែត្រូវបានក្រុមអ្នកសារព័ត៌មានយកធ្វើជាទីតាំងបណ្ដោះអាសន្ន ដើម្បីផ្ដល់ព័ត៌មានត្រូវបានកម្លាំងទាហានស៊ីរីបាញ់កម្ទេចចោល ។ ក្រៅពីនេះនៅមានមនុស្សមួយចំនួនទៀតក៏ជាអ្នកសារព័ត៌មាន និងក្រុម ជួយសង្គ្រោះត្រូវបានស្លាប់និងរបួសក្នុង ហេតុការណ៍ប៉ះទង្គិចគ្នានោះដែរ ។
ព័ត៌មានស្ដីពីការស្លាប់របស់នាង Colvin ធ្វើឱ្យកក្រើកបណ្ដាញព័ត៌មាននានារបស់អាមេរិក និងអង់គ្លេស ។ ចំណែកអ្នកសារព័ត៌មានរូបភាព លោក Remi Ochlik ក៏ធ្លាប់ទទួលបានរូបភាពជាច្រើននៅក្នុងប្រទេសបារាំង ហើយលោកក៏ជាអ្នកសារព័ត៌មានវ័យក្មេងជាងគេបំផុតដែលត្រូវគេសម្លាប់ ពេលកំពុងបំពេញបេសកកម្មនៅបរទេស ។
បណ្ដាមេដឹកនាំលោកខាងលិចប្រតិកម្ម យ៉ាងខ្លាំងក្លា និងរិះគន់ដល់អំពើហិង្សា ក្នុងប្រទេសស៊ីរី ឈានដល់ការសម្លាប់ អ្នកសារព័ត៌មានបរទេស ។ គ្រាន់តែនៅ ក្នុងថ្ងៃទី២១ កុម្ភៈ មានអ្នកស្លាប់ប្រមាណ ៦០នាក់ ដោយការវាយប្រហាររបស់ រដ្ឋាភិបាល ទៅលើក្រុមប្រឆាំងនៅទីក្រុង ហូម ។
ស្ថានការណ៍នៅស៊ីរី កាន់តែធ្ងន់ធ្ងរទៅពី១ថ្ងៃទៅ១ថ្ងៃ ធ្វើឱ្យសហគមន៍អន្ដរជាតិថ្កោលទោសយ៉ាងខ្លាំង ពិសេសលោកខាងលិចមានគម្រោងផ្គត់ផ្គង់សព្វាវុធឱ្យទៅក្រុមបះបោរនៅស៊ី រី ដើម្បីទប់ស្កាត់ការវាយប្រហាររបស់ទាហានរដ្ឋាភិបាល ។ តាមរបាយការណ៍របស់អង្គការសហប្រជាជាតិឱ្យដឹងថា អំពើហិង្សានៅប្រទេសស៊ីរីបានសម្លាប់មនុស្សជិត៦ពាន់នាក់ហើយមក ទល់ពេលនេះ ៕
