ដោយ ៖ សាធី
ថ្ងៃទី 22-02-2012 ម៉ោង 14:28:48 អ៊ីរ៉ង់ នឹងបាញ់បង្ហោះផ្កាយរណបផលិតដោយខ្លួនឯងប្រភេទ Fajr ឡើងទៅតារា វិថីនាពេលដ៏ខ្លីខាងមុខចំពេលដែលកំពុងតែមានភាពតានតឹងយ៉ាង ខ្លាំងរវាងអ៊ីរ៉ង់នឹងលោកខាងលិច ។
ប្រធានក្រុមស្រាវជ្រាវពីអវកាស អ៊ីរ៉ង់ លោក Hamid Fezeli បានឱ្យដឹងថា ការផលិតផ្កាយរណបប្រភេទ Fajr ជិតរួចរាល់ហើយផ្កាយរណបនោះបំពាក់ដោយប្រព័ន្ធកាមេរ៉ា និងប្រព័ន្ធវាយតម្លៃសម្រាប់តាមដានសកម្មភាពនានា ។
គម្រោងពេលដំបូងផ្កាយរណបនោះនឹង ត្រូវបាញ់បង្ហោះឡើងនៅក្នុងខែកុម្ភៈ នាឱកាសខួបគម្រប់៣៣ឆ្នាំថ្ងៃបដិវត្ដន៍អ៊ិស្លាមអ៊ីរ៉ង់ ។ ប៉ុន្ដែគម្រោងត្រូវបាន ពន្យារពេលដោយអ៊ីរ៉ង់ចាំបាច់ត្រូវតែវាយតម្លៃត្រួតពិនិត្យទៅលើ បច្ចេកវិទ្យាមួយចំនួន ។
ប្រធានាធិបតីអ៊ីរ៉ង់ម៉ាម៉ូត អាម៉ាឌីនណេចាត ប្រកាសថា ប្រទេសរបស់លោកទើបតែទទួលបានជោគជ័យក្នុងបច្ចេកវិទ្យាផលិតផ្កាយរណប ហើយនឹងបញ្ជូន ទៅកាន់តារាវិថីផែនដីដែលមានចម្ងាយ៣៥ពាន់គីឡូម៉ែត្រ ។
សារព័ត៌មាន AFP បានផ្សព្វផ្សាយថា កម្មវិធីបរមាណូរបស់អ៊ីរ៉ង់បង្កឱ្យ មានការព្រួយបារម្ភយ៉ាងខ្លាំងទៅដល់លោកខាងលិចដែលតែងតែចាត់ទុកថា កម្មវិធីអវកាសរបស់អ៊ីរ៉ង់ប្រើប្រាស់សម្រាប់ការបាញ់បង្ហោះ កាំជ្រួចមីស៊ីលបំពាក់ក្បាលគ្រាប់បរមាណូ ៕
