ដោយ ៖ សាធី
ថ្ងៃទី 08-02-2012 ម៉ោង 17:40:15 ក្រុម បាតុករបានវាយប្រហារស្ថានទូតចិននៅទីក្រុងទ្រីប៉ូលី ដើម្បីប្រឆាំងនឹងរដ្ឋាភិបាលទីក្រុងប៉េកាំងដែលច្រានចោល សេចក្ដីសម្រេចរបស់អង្គការសហប្រជាជាតិស្ដីពីស៊ីរី ។
ពលរដ្ឋប្រមាណ៥០នាក់បាន ប្រមូលផ្ដុំគ្នានៅមុខស្ថានទូតចិននៅទីក្រុងទ្រីប៉ូលី ដោយគ្រវីទង់ជាតិក្រុមប្រឆាំង និងគប់ដុំថ្ម ស៊ុត ប៉េងបោះ ចូលក្នុងបរិវេណស្ថានទូតចិន ។
នៅក្នុងការធ្វើបាតុកម្មដូចគ្នា នេះដែរ ក៏បានកើតឡើងនៅមុខស្ថានទូតរុស្ស៊ី ដោយក្រុមបាតុករបានហែកទង់ជាតិរុស្ស៊ីចោល ហើយបង្ហូតទង់ជាតិរបស់ប្រទេសលីប៊ីឡើងវិញ ។
មានប្រសាសន៍នៅក្នុងកិច្ចប្រជុំ ជាប្រចាំរបស់ក្រសួងការបរទេសចិន អ្នកនាំពាក្យក្រសួងការបរទេសបានបញ្ជាក់ថា ចិនមានការព្រួយបារម្ភយ៉ាងខ្លាំងពីការវាយប្រហារទៅលើស្ថានទូតនោះ ។ ចិនបានជម្រុញឱ្យភាគីលីប៊ី អនុវត្ដវិធីសាស្ដ្រចាំបាច់ដើម្បីការពារសុវត្ថិភាព និងទ្រព្យសម្បត្ដិដល់ស្ថានទូតតាមកិច្ចព្រមព្រៀងទីក្រុង Vienna ។
កន្លងមកចិន និងរុស្ស៊ី បានច្រានចោលសេចក្ដីព្រាងច្បាប់ដែលស្នើឡើងដោយសម្ព័ន្ធអារ៉ាប់ ដើម្បីថ្កោលទោសរដ្ឋាភិបាលស៊ីរីដែលប្រើអំពើហិង្សាលើប្រជាពលរដ្ឋ ។ រុស្ស៊ី និងចិន ចាត់ទុកថា ប្រសិនបើច្បាប់ខាងលើត្រូវបានអនុម័តនោះជាការបើកផ្លូវក្នុងការ ជ្រៀតជ្រែកដោយយោធាទៅលើប្រទេសនេះ ៕
