ការរញ្ជួយដី​ខ្លាំងមួយ​ ក្នុងកំរិត​ ៧,៤ វិចទ័រ​ បានធ្វើឲ្យ​រង្គើរ​ភាគ​ខាងកើត​ និង​ខាងត្បូងប្រទេស Mexico កាលពីម្សិលមិញ ជាហេតុ​ធ្វើឲ្យ​អគារ​តិចបំផុត​ ៦០ នៅកៀក​ស្នូល​រញ្ជួយ និង​ស្ពាន​មួយ នៅ​រដ្ឋធានី បានបាក់ស្រុត​។ មនុស្ស​ម្នា​នាំគ្នា​រត់ចេញ​ប្រសាច​ពី​អគារ​ការិយាល័យ​ទាំងឡាយ​​ ដោយខ្លាច​បាក់សង្កត់។
ស្ថាប័នសិក្សា​ភូកុម្ពសាស្រ្ត​អាមេរិក (USGS) ឲ្យដឹងថា ការរញ្ជួយដី​ ៧,៤ វិចទ័រ​ ហើយមានស្នូល​រញ្ជួយ​ចម្ងាយ​ពីទីក្រុង Ometpec នៃរដ្ឋ Giuerrero ប្រមាណ​ ២៥ គីឡូម៉ែត្រ ប៉ែកខាងកើត។ តាម​ស្ថាប័ននេះដែរ ការរញ្ជួយដី​ បានកើត​​ឡើងនៅ​វេលាម៉ោង​ ១២ និង ០៣ នាទី (ម៉ោងតំបន់) ហើយស្ថិតនៅក្នុង​ជម្រៅ ១៧,៥ គីឡូម៉ែត្រ។
តាម​អភិបាលរដ្ឋ​ Guerrero លោក Angel Angairre ឲ្យដឹងថា មានអគារ​ប្រមាណ​ ៥០០ បានរងការ​ខូចខាត​នៅរដ្ឋនេះ។
លោកអភិបាលរដ្ឋនៅ​បានឲ្យដឹងទៀតថាៈ ពុំមាន​របាយការណ៍​ពីការ​ស្លាប់ របួស នៅ Guerrero ឬ រដ្ឋ​ជាប់គ្នានេះទេ ប៉ុន្តែ​សមត្ថកិច្ច​កំពុង​ត្រួតពិនិត្យ​មើល​​តាម​សាលារៀន​ និង​បណ្តា​អាគារ​សាធារណៈ​ នៅជិតក្រុង​ Ometepec ។

បើតាម​ នាយកស្ថាប័នរញ្ជួយដីរបស់ Mexico នោះនៅមាន​ការរញ្ជួយ​ ៦ លើកទៀត ក្រោយ​ខណៈពេលនេះ ព្រមទាំង​ព្យាករណ៍​ថា នឹង​មានការរញ្ជួយដី​ ១លើក ក្នុងរង្វង់​ ២៤ ម៉ោង ខាងមុខនេះ តែវាមានកំរិត ៥,៣ វិចទ័រ។

ក្នុងព្រឹត្តិការណ៍​មួយផ្សេងទៀត កូនស្រី​ប្រធានាធិបតី​អាមេរិក អូបាម៉ា គឺនាង Malia Obama ដែលធ្វើដំណើរទេសចរណ៍​តាមកម្មវិធី​របស់សាលា​នៅរដ្ឋ Oaxaca ភាគនារតី Mexico ឲ្យដឹងថា នាងមានសុវត្ថិភាព​ទេ។ បើតាមស្ថាប័ន USGS អាមេរិក​ នោះការរញ្ជួយដីនៅ Mexico គេអាច​មានអារម្មណ៍​ខ្លាំងដែរ នៅ Oaxaca៕