ប្រទេស៥ ជាសមាជិក​អចិន្ត្រៃយ៍​ក្រុមប្រឹក្សា​សន្តិសុខ​អង្គការ​សហ​​ប្រជាជាតិ​ និង​អាល្លឺម៉ង់ កាលពីម្សិលមិញ (៨ មីនា) បានប្រកាស​ថា ពួកគេ​ត្រៀម​តភ្ជាប់​ជុំ​ចរចារ​នុយក្លេអ៊ែរ​ ជាមួយ​អ៊ីរ៉ង់។

តាម​ស្ថានីយ៍ទូរទស្សន៍​ផ្កាយរណប​ Press TV ឲ្យដឹងថា ក្នុង​សេចក្តី​ថ្លែងការណ៍​រួម​មួយ​ បណ្តា​ប្រទេសៈ អាមេរិក ចិន រុស្ស៊ី បារាំង អង់គ្លេស និង​អាល្លឺម៉ង់ (P5+1 ឬ ៦ភាគី បូកទាំងអឺរ៉ុប) សរសេរថាៈ យើង​ខ្ញុំ​អំពាវនាវ​ឲ្យអ៊ីរ៉ង់ ចូលរួម​ចរចារ​ម៉ឺងម៉ាត់​​ដោយ​មិន​ចាំបាច់​លក្ខ័ណ្ឌអ្វីទាំងអស់។

មុននេះបន្តិច ប្រធាន​រដ្ឋសភា​អ៊ីរ៉ង់ Ali Larijari បានធ្វើ​ការ​ព្រមានថា បណ្តា​ជុំចរចារ​អនាគត​ រវាង​អ៊ីរ៉ង់ និង P5+1 នឹងមិនទទួលលទ្ធផល​អ្វី​ ប្រសិនបើ​លោក​ខាង​លិច​បន្ត​បង្ក​សម្ភាធ​ ចំពោះ​ប្រទេសខ្លួន។

អ៊ីរ៉ង់ និង P5+1 បានចរចារបាន ២ជុំ លើបញ្ហា​នុយក្លេអ៊ែរ​របស់អ៊ីរ៉ង់។ ជុំទី១ ប្រព្រឹត្តនៅហ្សឺណែវ កាលពី​ខែធ្នូ ២០១០ ហើយជុំទី២ នៅ Istanbal ប្រទេស​ទួគី ​កាលពីខែ​មករា ២០១១។

P5+1 កំពុងប្រឹងប្រែង​បញ្ចុះបញ្ចូល​ឲ្យអ៊ីរ៉ង់ផ្អាក​កម្មវិធី​ចម្រាញ់ Uranium តាមរយៈ​ការគំរាម​ដាក់ទណ្ឌកម្ម និង​បាន​ដាក់​ទណ្ឌកម្ម​ទៅលើប្រទេសនេះ។

ប៉ុន្តែទោះបីយ៉ាងនេះក្តី ក៏អ៊ីរ៉ង់ នៅបន្ត​ប្រកាស​ឌឺដងថា គេនឹង​ប្រដេញតាម​មហិច្ឆិតានុយក្លេអ៊ែរ ដល់ទីបញ្ចប់៕