ក្រោយពី​បានជ្រាបព័ត៌មាន និង​សម្លឹង​​មើល​រូប​ភាព​សារ​ចុះ​សារ​ឡើង​​ហើយ​​នោះ ធ្វើ​ឲ្យ​ប្រិយ​មិត្ត​អ៊ីន​ធើ​ណែត​ខ្លះ មាន​អារម្មណ៍​ក្តុក​ក្តួល អួល​​ណែន​ដើមក ហូរ​ទឹក​​ភ្នែក​ភ្លាមៗ​ផង​ដែរ ដោយ​សារ​​តែ​ទង្វើរ​គំរូ​​ដ៏​ល្អ​របស់​ក្មេង​ស្រី​ម្នាក់ ចំពោះ​អ្នក​មាន​គុណ​របស់​នាង។
ហេតុ​ការណ៍​ដែល​​​​ធ្វើឲ្យ​យើង​ស្ទើរតែទប់ទឹកភ្នែកមិនបាននេះ មានខ្លឹមសារដូចតទៅ៖
នៅភូមិដាច់ស្រយាលមួយ ស្ថិតនៅក្នុងខ័ណ្ឌ Guanling ខេត្ត Guizhou ក្មេងស្រី​អាយុ ១២​ឆ្នាំ ម្នាក់ ឈ្មោះ Huang Puli បាន​បង្ខំ​ចិត្ត​បោះ​បង់ការសិក្សា​ត្រឹមថ្នាក់បឋមសិក្សា ដើម្បី​បាន​មើលថែររក្សាឪពុករបស់នាង ដែល​កំពុង​ទទួលរងជំងឺ​ខូចខួរក្បាលយ៉ាងធ្ងន់ធ្ងរ ដោយសារ​ធ្លាក់​ពីលើដើមឈើ កាលពីឆ្នាំមុន (១៩ ធ្នូ) ។ ម្តាយរបស់ Huang មិន​ដែលត្រលប់មកផ្ទះទេ បន្ទាប់ពី​បាន​ចាកចេញពីផ្ទះអស់រយៈពេល ៣ឆ្មាំ កន្លងមក។

ភូមិនេះ គឺជាភូមិក្រក្សត់មួយ ផ្លូវហេដ្ឋារចនាសម្ព័ន្ធ​​មានការ​ខ្វះខាត និងពុំមានភាពងាយស្រួល​​ទេ។ បើ​និយាយ​ពី​ស្ថាន​ភាព​គ្រួ​សារ​​របស់​កុមារី Huang គឺរឹតតែដុនដាបទៅទៀត។ សព្វថ្ងៃនាងរស់នៅជាមួយជីដូនចាស់ជរា និងឪពុកកំពុងមានជំងឺ។
ស្ថិតក្នុងស្ថានភាពទីទាល់ក្របែបនេះ តម្លៃថ្នាំពេទ្យខ្ពស់ បានក្លាយជាបន្ទុកមួយយ៉ាងធ្ងន់ធ្ងរបំផុត សំរាប់​​គ្រួ​សារ​មួយ​​នេះ។ Huang Puli បាន​ខ្ចី​ប្រាក់​គេ ១១០.០០០ យន់ ដើម្បីបង់ថ្លៃផ្នែក​វះកាត់សសៃប្រសាទឪពុក នៃមន្ទីរពេទ្យ​ “Anshun City People” ស្ថិតនៅខេត្ត​ Guizhou ដែលជាកន្លែងឪពុករបស់នាងកំពុងសំរាកព្យាបាល។

រាល់ពេលព្រឹកម៉ោង ​ ៦:០០ បន្ទាប់ពីក្រោកពីដំណេក នាងតូច​បាន​លាងចាន... ដាំបបរ​ ដើម្បី​បញ្ចុក​ឪពុក។ បន្ទាប់​មក នាង​​បាន​ជួយ​ឪពុក ធ្វើលំហាត់ប្រាណលើគ្រែ​កុំឲ្យងាប់សសៃ និងជួយ​ម៉ាស្យាឲ្យថែមទៀត។
រឿងរ៉ាវដ៏កំសត់របស់ Huang Puli បានធ្វើឲ្យគេគ្រប់ៗគ្នាដឹងឮ និងអាណិតអាសូរជាពន់ពេក។ សាលា​រៀន​​បាន​​ផ្តល់​​ប្រាក់​​ឧបត្ថម្ភ​ចំនួន ៥០.០០០ យន់ និងអ្នកភូមិក៏បានរៃអង្គៀសគ្នា​បានប្រាក់សរុបចំនួន ១,៨០០ យន់ និងក៏មានប្រាក់ឧបត្ថម្ភពីសប្បុរសជនជាបន្តបន្ទាប់ទៀតផងដែរ៕