យោងតាមកម្លាំងល្បាតឆ្នេរសមុទ្រកូរ៉េខាងត្បូង បានឲ្យដឹងថា ពួកគេបានចាប់ខ្លួនអ្នកនេសាទចិន ៩ នាក់ បន្ទាប់ពីប្រទល់មុខដាក់គ្នានឹងទូកនេសាទចិន១គ្រឿង នៅក្នុងសមុទ្រចិនខាងត្បូង ដែលបានបណ្តាលឲ្យមន្រ្តីការពារឆ្នេរសមុទ្រកូរ៉េខាងត្បូង រងរបួស ។
ដំណើររឿងនៃហេតុការណ៍នេះ បានបន្តឲ្យដឹងថា នៅពេលមន្រ្តីកូរ៉េ ៤រូប មានបំណងចូលទៅជិតទូកនេសាទចិននោះ ដែលត្រូវបានចោទថា កំពុងនេសាទខុសច្បាប់នៅក្នុងសមុទ្រលឿង ក៏ស្រាប់តែកម្មករទូកនេសាទចិនជាច្រើននាក់ បានកាន់ព្រនង់ កាំបិត និងអាវុធដទៃទៀត ឆ្ពោះសំដៅទៅពួកគេ រួចធ្វើការវាយប្រហារទៅលើពួកគេតែម្តង បណ្តាលឲ្យមន្រ្តីកូរ៉េ ៣ រូប រងរបួសត្រង់ក្បាល ដៃ និងជើង ហើយ ម្នាក់ទៀត ត្រូវធ្លាក់ចូលក្នុងទឹកសមុទ្រ ។ ក្រោយមក ពួកគេទាំង ៤ នាក់ ក៏ត្រូវបានជួយសង្គ្រោះ និងបញ្ជូនទៅកាន់មន្ទីរពេទ្យដោយឧទ្ធម្ភាចក្រ ។
ហេតុការណ៍នេះ បានកើតឡើង ទើបតែជាង១សប្តាហ៍ក្រោយការចេញសាលក្រមដាក់ទោស ដែលត្រូវបានប្រកាសជាសាធារណៈ ដោយកូរ៉េខាងត្បូង ទៅកាន់វរនាវីឯកចិនម្នាក់ ដែលបានសម្លាប់មន្រ្តីការពារសមុទ្រកូរ៉េម្នាក់ និងសមាជិកនាវិក ៩ នាក់ ទៀត ។
កូរ៉េខាងត្បូង បានធ្វើការតវ៉ាជាឱឡារិកមួយ ទៅកាន់រដ្ឋាភិបាលចិនភ្លាមៗ បន្ទាប់ពីហេតុនេះបានកើតឡើង ហើយខាងភាគីចិន បានសម្តែងការសោកស្តាយ និងសន្យាទប់ស្កាត់ករណីបែបនេះ ។
វាត្រូវបានឲ្យដឹងថា ចាប់តាំងពីដើមឆ្នាំនេះ កងកម្លាំងការពារឆ្នេរសមុទ្រកូរ៉េខាងត្បូង បានរឹបអូស និងចាប់ខ្លួនអ្នកនេសាទចិនចំនួន ១០០ នាក់ នៅក្នុងសមុទ្រលឿងនេះ ៕
