ការផ្ទេរអំណាចកងទ័ពដល់កងកម្លាំងអាហ្វហ្គានីស្ថានដំណាក់ការទី៣ នេះ ជាផ្នែកមួយនៃវិធានការ៥ ដំណាក់ការ របស់អង្គការណាតូ មុននឹងដកខ្លួនចេញពីសង្គ្រាមនៅអាហ្វហ្គានីស្ថាន ហើយស្រុក១២២ នៅក្នុងប្រទេសនេះ នឹងស្ថិតក្រោមការត្រួតត្រារបស់កងកម្លាំងក្នុងតំបន់វិញ ដែលនេះមានន័យថា កងកម្លាំងអាហ្វហ្គានីស្ថាន បានត្រួតត្រាលើផ្នែកសន្តិសុខ បាន៧៥% ហើយ។
លោកអូបាម៉ា បានស្វាគមន៍ក្នុងសេចក្តីថ្លែងការណ៍ថា” ខ្ញុំសូមស្វាគមន៍ចំពោះការប្រកាសរបស់លោកប្រធានធិបតី(ហាមីដ) ការហ្សៃ លើការផ្លាស់ប្តូរជំហានទី៣ នៅថ្ងៃនេះ ដែលនេះជាការប្រឹងប្រែងថ្មីមួយ របស់យើង នៅក្នុងប្រទេសអាហ្វហ្គានីស្ថាន”។
រដ្ឋាភិបាលអាហ្វហ្គានីស្ថាន បាននិយាយថា ការផ្ទេរអំណាចកងទ័ពមកដល់កងកម្លាំងអាហ្វហ្គានីស្ថានវិញ នៅដំណាក់ការទី៣នេះ នឹងចាប់ផ្តើមក្នុងពេលឆាប់ៗនេះ ដែលវានឹងត្រូវចំណាយពេលយ៉ាងតិច៦ខែ ហើយការបញ្ចប់អាណត្តិរបស់កងកម្លាំងអន្តរជាតិ នៅអាហ្ចហ្គានីស្ថាន នឹងប្រើរយៈពេលពី១២ ទៅ១៨ខែ។
អង្គការណាតូ មានកងកម្លាំងសរុប ១៣០.០០០នាក់ ជួយដល់រដ្ឋាភិបាលការហ្សៃ ប្រយុទ្ធប្រឆាំងនឹងការបះបោររបស់ក្រុមជ្រុលនិយមតាលីបង់ ។ កងកម្លាំងទាំងនេះ នឹងត្រូវដកចេញនៅចុងឆ្នាំ២០១៤ នៅពេលដេលយន្តការផ្ទេរការត្រួតត្រា ត្រូវបានបញ្ចប់។ ជាមួយគ្នានោះ អង្គការណាតូ ក៏បានបង្វឹកកងកម្លាំងអាហ្វហ្គានីស្ថាន ៣៥០.០០០នាក់ ដើម្បីរក្សាសន្តិសុខផងដែរ។
លោកអូបាម៉ា បាននិយាយថា” ខ្ញុំរំពឹងថា លោកប្រធានាធិបតីការហ្សៃ នឹងក្រុមមេដឹកនាំដទៃទៀត ដែលនឹងមកចូលរួមប្រជុំនៅឈីកាហ្គោ នឹងប្រឹងប្រែងរួមគ្នា ដើម្បីពង្រឹងសន្តិសុខ និងអធិបតេយ្យភាពបូរណភាពដែនដីអាហ្វហ្គានីស្ថាន"។
គួរបញ្ជាក់ថា ក្រុមមេដឹកនាំអង្គការណាតូ នឹងបើកកិច្ចប្រជុំនៅថ្ងៃទី២០-២១ឧសភា នៅក្រុងឈីកាហ្គោ ដើម្បីបង្កើនភាពជាដៃគូនឹងគ្នា ក៏ដូចជាពិភាគ្សាលម្អិតពីការដកកងទ័ពពីអាហ្វហ្គនីស្ថាន ដែលក្នុងកិច្ចប្រជុំកំពូលនេះ ដែលគេរំពឹងថា នឹងមានភាពចម្រូងចម្រាសខ្លះ នៅពេលដែលប្រធានាធិបតីបារាំង ទើបនឹងជាប់ឆ្នោតថ្មី លោកហ្វ្រង់ស័រ ហូល្លង់ដេ(Francois Hollande) បានសន្យាក្នុងអំឡុងពេលធ្វើយុទ្ធនាការបោះឆ្នោតថា នឹងជំរុញឲ្យប្រទេសរបស់លោក ឲ្យដកកងទ័ពបារាំង៣.៣០០នាក់ ចេញពីអាហ្វហ្គានីស្ថាន ឲ្យអស់នៅចុងឆ្នាំនេះ៕
