អ៊ីតាលី (BBC): រញ្ជួយ​​ដី​មួយ​ នៅ​ភាគ​ខាង​ជើង​ប្រទេស​អ៊ីតាលី បាន​សម្លាប់​មនុស្ស​យ៉ាង​តិច​៧ នាក់ ខណៈ​ដែល​អគារ​ជា​ច្រើន នៅ​ក្រុង​៣-៤ រួម​ទាំង​សំណង់​បេតិក​ភ័ណ្ឌ​ជាតិ បាន​រង​ការ​បាក់​រលំ​ខូច​ខាត។
រញ្ជួយដីកម្រិត ៦រិចទ័រ នៅវេលាម៉ោង៤ និង០០នាទី ព្រឹក (ម៉ោងក្នុងតំបន់) នៅចម្ងាយប្រមាណ៣៥គ.ម ភាគខាងជើង​ក្រុងបូឡុកណា (Bologna) បានបណ្តាលឲ្យជនរងគ្រោះ ៧នាក់ ស្លាប់ និងជាង៥០នាក់ រងរបួស។ ក្នុងនោះមនុស្ស២នាក់ បានស្លាប់ នៅសានថ៍ អាហ្គោ​ស្ទីណូ (Sant'Agostino) នៅពេលដែលរោងចក្រសេរ៉ាមិក រលំ។ មនុស្សម្នាក់ទៀត ដែលគេជឿថាជាជនជាតិម៉ារ៉ុក បាន ស្លាប់នៅ​តំបន់​ប៉ុងតេ រ៉ូដូនី ដូបូណូដូ (Ponte Rodoni do Bondeno)។ ខណៈដែលនៅតំបន់តេខូប្រ៊េសស៍ ឌីដូសសូ (Tecopress di Dosso) កម្មករ ​ម្នាក់ បានស្លាប់ នៅពេលដែលដំបូលអគារដួលរលំ។ រញ្ជួយដីនេះ មានជម្រៅរាក់ ត្រឹមតែ១០គ.ម ប៉ុណ្ណោះ។ មិន​​ត្រឹមតែក្រុងបូឡូកណា, ហ្វឺររ៉ារ៉ា (Ferrara), វើរ៉ូណា(Verona) និងម៉ានទួរ (Mantua)ដែលទទួលរងការរំញ័រ សូម្បីតែក្រុង មីឡាន (Milan) និងវេនីស (Venice) ដែលនៅឆ្ងាយ ក៏ទទួលរងរំញ័រដូចគ្នាដែរ។
រដ្ឋាភិបាល បាននិយាយថា រញ្ជួយដីនេះ បានធ្វើបេតិកភ័ណ្ឌវប្បធម៌ជាតិ នៅតំបន់អេមីលៀ រ៉ូមែកណា (Emilia Romagna)។
ក្រសួងវប្បធម៌អ៊ីតាលី បាននិយាយថា ក្រុមពន្លត់អគ្គិភ័យ និងបុគ្គលិកការពារជនស៊ីវិល ខណៈនេះកំពុងអង្កេត​មើលការ​ខូចខាតនៅ​សំណង់​ប្រវត្តិសាស្ត្រទាំងនេះ។
នេះជាការរញ្ជួយដ៏ធ្ងន់ធ្ងរមួយ ដែលបានកើតឡើងនៅក្នុងប្រទេសនេះ បន្ទាប់ពីការរញ្ជួយដីនៅតំបន់ឡាគ្វីលឡា (L'Aquila) ដែល​បាន​​សម្លាប់មនុស្ស នៅតំបន់ភាគកណ្តាលប្រទេសអ៊ីតាលី កាលពីឆ្នាំ២០០៩។
តំបន់ភាគខាងជើងប្រទេសអ៊ីតាលី តែងតែរងការរញ្ជួយដីតិចៗ ជាញឹកញាប់ ប៉ុន្តែដោយសារតែប្រទេសនេះ បានត្រៀមលក្ខណៈ​បាន​ល្អ​នោះ ទើបការបាត់បង់ជីវិតមនុស្សមានតិចតួច។ ពិសេស នៅមុនពេលរញ្ជួយដី ក្រុមមន្ត្រីសង្គ្រោះគ្រាមានអាសន្ន បានជម្លៀស​អ្នក​ជំងឺ ចេញពីមន្ទីរពេទ្យ​អស់ទៅហើយ៕