ព័ត៌មានអន្តរជាតិ: រុស្ស៊ីត្រៀមមានទម្របាញ់កាំជ្រួចបំបាំងកាយ

បណ្តាទម្របាញ់កាំជ្រួចអន្តរទ្វីប ដែនដីចល័តរបស់រុស្ស៊ី នឹងត្រូវបានបំពាក់ប្រព័ន្ធបំភ័ន្តថ្មីមួយ សំដៅធ្វើឲ្យវាមិនងាយមើលឃើញបាន ។

ប្រព័ន្ធកាំជ្រូចអន្តរដែនដី Topl-M (SS-27 SickleB)

Ria novosti ដែលដកស្រង់សម្តីរបស់អ្នកនាំពាក្យក្រសួងការពារជាតិរុស្ស៊ី Vadim Koval នៅថ្ងៃនេះ ឲ្យដឹងថា ឧបករណ៍ថ្មីពុំត្រឹមតែបំបាំងបានយ៉ាងមានប្រសិទ្ធិភាពដល់ទម្របាញ់ កាំជ្រូចដែលត្រូវបានដាក់ពង្រាយប៉ុណ្ណោះទេ ថែមទាំងភ្លាមៗនោះ អាចលុបចោលស្លាកស្នាមលើផ្ទៃដី សំដៅរក្សាជិតនូវសកម្មភាពរបស់ទម្របាញ់ទាំងនេះ ។

ឧបករណ៍ពិសេសនេះ នៅអាចបង្កើតបាននូវស្លាស្នាមក្លែងក្លាយ ដើម្បីបញ្ជៀសការតាមដានរបស់បច្ចាមិត្ត ។ វាក៏កាត់បន្ថយរយៈពេលចាំបាច់ច្រើនដង ក្នុងការបិទបាំងឲ្យប្រព័ន្ធកាំជ្រួចចល័ត ។

លោក Koval ឲ្យដឹងបន្ថែមថា ប្រព័ន្ធទម្រចល័តរបស់កាំជ្រួចអន្តរដែនដី របស់កងពលធំកាំជ្រួចយុទ្ធសាស្រ្ត Teykovo នៅតំបន់ Ivanovo របស់រុស្ស៊ី គឺជាអង្គភាពដំបូង ត្រូវបានបំពាក់បច្ចេកវិទ្យាបំបាំងកាយជំនាន់ថ្មីបំផុតនេះ ។ ពេលវេលាអនុវត្ត គឺនៅចុងឆ្នាំនេះ ។

Teykovo បោះទីតាំងចម្ងាយ ២៨០ គីឡូម៉ែត្រ ពីទីក្រុងមូស្គូ វារួមមានប្រព័ន្ធកាំជ្រួចអន្តរដែនដី Topol-M(SS-27 SickleB) និង Yars (R5-24) ៕