ថ្ងៃទី 14 ខែមិថុនា ឆ្នាំ2012, ម៉ោង 10:51 PM ប្រែសម្រួលៈ ឃ្លោក ចន្នី
ភូមា (BBC) ៖ ប្រធានគណបក្សគាំទ្រលិទ្ធិប្រជាធិបតេយ្យភូមា លោកស្រីអង់សាន ស៊ូជី បានចាប់ផ្តើមធ្វើទស្សនកិច្ចនៅតំបន់អឺរ៉ុប ដោយចាប់ផ្តើមពីប្រទេសស្វីស ដើម្បីថ្លែងទៅកាន់អង្គការសហប្រជាជាតិ លើយុទ្ធនាការប្រឆាំងពលកម្មលើកុមារ និងទាសភាពនៅប្រទេសភូមា។
ប្រភពព័តមានបានរាយការណ៍ថា លោកស្រី នឹងចំណាយពេលប្រហែល២សប្តាហ៍ ដើម្បីទស្សនកិច្ចនៅតំបន់អឺរ៉ុប ក្នុងនោះមាន អង់គ្លេស ស្វីស អៀរឡង់ដ៍ បារាំង និងន័រវ៉េយ៍។ ហើយនេះជាការបំពេញទស្សនកិច្ចនៅអឺរ៉ុបជាលើកទី២ ក្នុងរយៈពេល២៤ ឆ្នាំកន្លងមកនេះ ក្រោយពីលោកស្រីបានបំពេញទស្សនកិច្ចលើកដំបូង នៅឆ្នាំ១៩៨៨ ដោយសារតែស្ថានការណ៍នយោបាយក្នុងប្រទេស ប្រែប្រួល។
លោកស្រីអង់សាន ស៊ូជី បានថ្លែងឱ្យដឹងប្រាប់អ្នកយកព័ត៌មាន មុនពេលដែលលោកស្រីចេញពីប្រទេសថា “ខ្ញុំរំពឹងថា ដំណើរទស្សនកិច្ចនៅតំបន់អឺរ៉ុបលើកនេះ នឹងធ្វើឱ្យអឺរ៉ុបឃើញថា ប្រទេសនីមួយៗខុសគ្នា ហើយខ្ញុំនឹងព្យាយាមបំពេញការងារឱ្យបានប្រសើរបំផុត សម្រាប់ប្រជាជន”។
គួរបញ្ជាក់ថា លោកស្រីគឺជាអតីតជ័យលាភីពានរង្វាន់ណូបែលសន្តិភាពឆ្នាំ១៩៩១ និងរងការឃុំខ្លួននៅក្នុងខ្លះ ក្នុងនាមជាអ្នកទោសនយោបាយអស់កាលជិត២០ ឆ្នាំ ប៉ុន្តែលោកស្រីត្រូវបានគេដោះលែងនៅចុងឆ្នាំ២០១០ ដើម្បីប្រឡូកក្នុងឆាកនយោបាយម្តងទៀត និងបានឈ្នះអាសនៈជាច្រើន នៅក្នុងសភារបស់ភូមា តាមរយៈការបោះឆ្នោត ខែមេសា កន្លងមក ដែលនេះគឺជាសញ្ញាមួយនៃរដ្ឋាភិបាលភូមា ដែលបានផ្លាស់ប្តូរកែទម្រង់នយោបាយ ដែលគ្រប់គ្រងដោយយោធាអស់កាលជាយូរមកហើយនោះ៕
