ថ្ងៃទី 14 ខែមិថុនា ឆ្នាំ2012, ម៉ោង 11:13 PM ប្រែសម្រួលៈ ម៉ាណែត
កេនយ៉ា (BBC): បុរសម្នាក់ ដែលជាប់សង្ស័យពាក់ព័ន្ធនឹងការវាយប្រហារលើផ្សារទំនើបមួយ កណ្តាលរដ្ឋធានីណៃរ៉ូប៊ី (Nairobi) ក្នុងប្រទេសកេនយ៉ា កាលពីខែមុន ត្រូវបានចាប់ខ្លួននៅក្នុងប្រទេសជិតខាងតង់ហ្សានី។ប៉ូលិសកេនយ៉ា បាននិយាយថា លោកអេមរ៉ា អឺរដូហ្គែន (Emrah Erdogan) អាយុ ២៤ឆ្នាំគឺមានសញ្ញាតិអាល្លឺម៉ង់ ដើមកំណើតទួរគី ត្រូវបានចោទប្រកាន់ថា លោកបានឆ្លងកាត់ចូលក្នុងទឹកដីកេនយ៉ា កាលពីខែឧសភា តាមច្រកព្រំដែនសូម៉ាលី និងបានចូលរួមការវាយប្រហារជាមួយនឹងក្រុមសកម្មប្រយុទ្ធអ៊ីស្លាម អាល់ សាបាប់ ។
ក្រុមអាជ្ញាធរកេនយ៉ា បាននិយាយថា មនុស្សប្រមាណជាង៣០ នាក់ ត្រូវបានរងរបួសក្នុងហេតុការណ៍បំផ្ទុះគ្រាប់បែក។
ក្រុមសកម្មប្រយុទ្ធអាល់សាបាប់ ក៏បានធ្វើការគំរាមកំហែងវាយប្រហារសងសឹកវិញ បន្ទាប់ពីប្រទេសកេនយ៉ា បានបញ្ជួនកងទ័ពរបស់ពួកគេ ចូលក្នុងទឹកដីសូម៉ាលីកាលពីឆ្នាំទៅមិញ។
ជាមួយគ្នានេះដែរ ប៉ូលិសតង់ហ្សានី បានអះអាងថា ជនសង្ស័យអឺរដូហ្គេន ត្រូវបានចាប់ខ្លួន រួមជាមួយមនុស្ស៤នាក់ ផ្សេងទៀត ដែលមន្ត្រីប៉ូលិសកេនយ៉ា បានធ្វើការតាមស៊ើបអង្កេត ចាប់តាំងពីមានការវាយប្រហារនោះមក។
បន្ថែមពីលើនេះ ភ្នាក់ងារសារព័ត៌មានរ៉យទ័រ បានរាយការណ៍ឱ្យដឹងថា លោកអឺរដូហ្គេន ជាសមាជិកមកពីក្រុមសកម្មប្រយុទ្ធ សាឡាហ៊ូដឌីន អាល់ខឺរឌី (Salahuddin al Kurdi) ត្រូវបានគេជឿថា បានធ្វើដំណើរចូលក្នុងទីក្រុងវ៉ាហ្ស៊ីរីស្ថាន នាភាពពាយ័ព្យប្រទេសប៉ាគីស្ថាន កាលពីដើមឆ្នាំ២០១០ ដែលជាទីកន្លែងមួយ ដែលលោកបានចូលរួមជាសមាជិកក្នុងក្រុមវាយប្រហារមួយនោះ មុនពេលធ្វើដំណើរចូលទៅក្នុងប្រទេសសូម៉ាលី កាលពីឆ្នាំទៅមិញ៕អង្គរធំ
