ថ្ងៃទី 22 ខែសីហា ឆ្នាំ2012, ម៉ោង 05:49 AM ប្រែសម្រួលៈ ស៊ុនហ្វាន
លោកថាក់ស៊ីន ឈីណាវ៉ាត់ និងប្អូនស្រី លោកស្រីយិងឡាក់ ឈីណាវ៉ាត់ នាយករដ្ឋមន្ត្រីថៃថៃ (Thairath): លោកស្រីយិងឡាក់ ឈីណាវ៉ាត់ នាយករដ្ឋមន្ត្រីថៃ ត្រូវបានក្រុមប្រឆាំងចោទប្រកាន់ថា មិនបានបំពេញតួនាទី ប្រកាន់បក្សពួក សាច់ញាតិ បន្ទាប់ពីលោកស្រីមិនបានស្នើទៅអាមេរិក ធ្វើបត្យាប័ន បញ្ជូនខ្លួនលោកថាក់ស៊ីន ឈីណាវ៉ាត់ ដែលត្រូវជាបងប្រុសរបស់លោកស្រី មកប្រទេសថៃវិញ ក្នុងឋានៈជាទណ្ឌិតឆ្លងដែន។
លោកស្រីយិងឡាក់ បានថ្លែងបញ្ជាក់ករណីដែលក្រុមហ្គ្រីន ត្រៀមធ្វើញត្តិ ប្តឹងទៅគណៈកម្មការការពារ និងបង្ក្រាបអំពើពុករលួយជាតិ ដោយចោទប្រកាន់លោកស្រីមិនបំពេញតួនាទីខ្លួន តាមមាត្រាទី១៥៧ លើករណីមិនស្នើសុំអាមេរិកធ្វើបត្យាប័ន បញ្ជូនខ្លួនលោកថាក់ស៊ីន ឈីណាវ៉ាត់ អតីតនាយករដ្ឋមន្ត្រីថៃ តាមកិច្ចព្រមព្រៀងបត្យាប័ន បញ្ជូនអ្នកទោសឆ្លងដែន រវាងអាមេរិក និងថៃ ថា លោកស្រីមិនបានបញ្ជាអ្វីទេ ដោយទុកករណីនេះ ឲ្យដំណើរការទៅតាមនីតិវិធីទៅចុះ។
ចំពោះព័ត៌មានដែលថា រដ្ឋាភិបាល ត្រៀមនឹងថ្លែងបញ្ជាក់ពីសមិទ្ធិផលរបស់ខ្លួន ក្នុងអំឡុងពេលដឹកនាំប្រទេសជាតិគម្រប់១ឆ្នាំ នៅថ្ងៃទី២៥-២៦សីហានោះ លោកស្រីនាយករដ្ឋមន្ត្រីថៃ បាននិយាយថា នេះជាការយល់ច្រឡំទេ ព្រោះខណៈនេះរដ្ឋាភិបាល កំពុងប្រមូលទិន្នន័យពីគ្រប់ស្ថាប័នពាក់ព័ន្ធ មុននឹងបោះពុម្ពជាសៀវភៅឯកសារ ដាក់ជូនសភាជាតិ។
គួរបញ្ជាក់ថា លោកស្រីយិងឡាក់ បានកាន់តំណែងជានាយករដ្ឋមន្ត្រី នៅថ្ងៃទី៣កក្កដា ២០១១ បន្ទាប់ពីគណបក្សភឿថៃ របស់លោកស្រី ទទួលបានអាសនៈ២៦៥ ក្នុងអាសនៈសភា ៥០០អាសនៈ ក្នុងការបោះឆ្នោតជាតិកាលពីឆ្នាំ២០១១។ ដោយសារតែលោកស្រីជាប្អូនស្រីបង្កើត របស់លោកថាកស៊ីន អតីតនាយករដ្ឋមន្ត្រីថៃ ដែលត្រូវបានបណ្តេញចេញពីអំណាចកាលពីឆ្នាំ២០០៦ ដោយរដ្ឋប្រហារយោធា ទើបលោកស្រីតែងតែរងការវាយប្រហារពីការព្រងើយកន្តើយក្នុងការតាមចាប់ខ្លួនលោកថាក់ស៊ីន ដែលរងការចោទប្រកាន់ប្រព្រឹត្តិអំពើពុករលួយ។ ប៉ុន្តែករណីនេះ លោកស្រីបានបញ្ជាក់ជាញយៗថា លោកស្រីមិនយល់ញាតិ ឃ្លាតច្បាប់នោះទេ តែទុកករណីនេះ ឲ្យដំណើរការទៅតាមនីតិវិធី ខណៈដែលក្រុមប្រឆាំងតែងតែតាមចាប់កំហុសជានិច្ច។
មុននេះបន្តិច គេជឿថា រដ្ឋាភិបាលក្មេងខ្ចី របស់លោកស្រី នឹងមិនអាចឈរជើងបាន១ ឆ្នាំទេ ប៉ុន្តែ គម្រប់ខួប១ឆ្នាំ បានកន្លងផុតទៅហើយ រដ្ឋាភិបាលនេះ នៅតែបោះជំហានទៅមុខជានិច្ច បើទោះជារងការវាយប្រហារ រិះគន់ពីក្រុមប្រឆាំងជាបន្តបន្ទាប់ក៏ដោយ។ គេរំពឹងថា នាយករដ្ឋមន្ត្រីស្រី វ័យ៤៥ ឆ្នាំ រូបនេះ នឹងបន្តដឹកនាំប្រទេសថៃទៅមុខទៀត ពិសេសស្តារមិត្តភាព និងបង្កើនចំណងការទូតជាមួយប្រទេសជិតខាង ពិសេស ករណីវិវាទរឿងប្រាសាទព្រះវិហារជាមួយកម្ពុជា៕AGKOR THOM
