ថ្ងៃទី 02 ខែសីហា ឆ្នាំ2012, ម៉ោង 03:56 PM ប្រែសម្រួលដោយ : ម៉ាណែត
ប៉េរូ (BBC): មន្ត្រីប៉ូលិសក្នុង ប្រទេសប៉េរូ បាននិយាយថា ពួកគេបានរឹបអូសក្រដាសប្រាក់ក្លែងក្លាយចំនួនទឹកប្រាក់២,៣លានដុល្លារ ដែលសង្ស័យថា ស្ថិតនៅក្រោមស្នាដៃបោះពុម្ពក្រដាសប្រាក់ក្លែងក្លាយរបស់ក្រុម គ្រួសារល្បីឈ្មោះ គ្វីស្ពេ រ៉ូទ្រីហ្គេស(Quispe Rosriguez )។
ស្នងការមន្ត្រីប៉ូ់លិសប៉េរូ លោករ៉ូល សាឡាហ្សារ (Raul Salazar) បាន ថ្លែងថា ក្រុមគ្រួសារអន្ធពាលនេះ បានរៀបចំផែនការរត់ពន្ធប្រកាសប្រាក់ក្លែងក្លាយ ៥០ពាន់ដុល្លារ ចូលទៅក្នុងទឹកដីសហរដ្ឋអាមេរិក ដែលបានបង្កប់លុយទាំងអស់នោះ នៅក្នុងវត្ថុអនុស្សាវរីយ៍របស់ប្រទេសប៉េរូ។
លោកសាឡាហ្សារ បាននិយាយថា បុរសមួយរូប ដែលរងបទចោទប្រកាន់ពាក់ព័ន្ធជាមួយនឹងក្រុមគ្រួសារគ្វីស្ពេ រ៉ូទ្រីហ្គេស មានឈ្មោះល្វីស អាល់ហ្វីដូ អូបានដូ ប៉ារីដឹស (Luis Alfredo Obando Paredes) ក៏ត្រូវបានចាប់ខ្លួនផងដែរ។ ប្រាក់ និងសម្ភារៈ សម្រាប់បោះពុម្ពក្រដាសប្រាក់ក្លែងក្លាយ ដូចជាទឹកថ្នាំបោះពុម្ពពិសេស និងក្រដាស ត្រូវបានរឹបអូសចេញពីក្នុងផ្ទះមួយ នៅរដ្ឋធានីលីម៉ា(Lima) បន្ទាប់ពី សាច់ញាតិដទៃទៀត ត្រូវបានចាប់ខ្លួនអស់រយៈពេល២ សប្តាហ៍មកហើយ ដោយរឹបអូសបានក្រដាសប្រាក់ដុល្លារ និងអឺរ៉ូក្លែងក្លាយ និងលុយសេសសល់បន្តិចបន្តួចផងដែរ។
ចំពោះបច្ចេកទេសក្នុងការបញ្ចូនប្រាក់ក្លែងក្លាយទៅក្រៅប្រទេស ដែលច្រើនតែបង្កប់ក្រដាសប្រាក់ នៅទីតាំងសម្ងាត់ៗខុសៗគ្នា ដើម្បីបញ្ចៀសពីការចាប់ឆែកឆេរនោះ គឺមានមធ្យោបាយស្រដៀងទៅនឹងការរត់ពន្ធគ្រឿងញៀន ដោយក្រុមរកស៊ីជួញដូររបស់ខុសច្បាប់ទាំងអស់នេះដែរ។
គួរបញ្ជាក់ថា នៅឆ្នាំនេះ ប៉េរូ បានរឹបអូសក្រដាសប្រាក់ក្លែងក្លាយបរទេស ចំនួន១៧លានដុល្លារ ហើយការរឹបអូសបានលើកនេះ ជាប្រាក់បរទេសក្លែងក្លាយដ៏ច្រើនបំផុត៕
