ថ្ងៃទី 12 ខែកញ្ញា ឆ្នាំ2012, ម៉ោង 11:21 AM ប្រែសម្រូលដោយ : ឃ្លោក ចន្នី
ថៃ (BBC) : អាជ្ញាធរក្រុងសុខោទ័យ បានប្រញាប់ដៃប្រញាប់ជើង ក្នុងការទប់ទឹកជំនន់មិនឱ្យលិចទីក្រុងប្រវត្តិសាស្ត្រនេះ ដោយបានយកបាវខ្សាច់មកបាំងធ្វើជាទំនប់ ដើម្បីបញ្ឈប់ទឹកជំនន់ ដែលលិចចេញពីទន្លេយុំ កាលពីថ្ងៃម្សិលមិញនេះ។
ប្រភពព័ត៌មានបានឱ្យដឹងថា ទឹកទន្លេយុំ ក្នុងក្រុងសុខោទ័យ បានកើនឡើងស្រឺតៗជាលំដាប់ តម្រូវឱ្យអាជ្ញាធរចាត់វិធានការជាបន្ទាន់ ដោយតម្រូវឱ្យមានការទប់ ដោយប្រើបាវខ្សាច់នៅតំបន់ច្រាំងទន្លេ ដើម្បីការពារកុំឱ្យបាក់ទំនប់ និងលិចទីក្រុងប្រវត្តិសាស្ត្រដ៏មានតម្លៃនេះ។
របាំងការពារទឹកដែលគេទប់នៅមានប្រវែង រហូតដល់ទៅ២០០ម. ឯណោះ ហើយទឹកដែលជ្រាបត្រូវបានគេបូមចេញ។ ម៉្យាងទៀត ទឹកជំនន់នេះមានកម្ពស់ រហូតដល់ទៅ២ ម៉ែត្រឯណោះ។
លោកព្រីឆា រ៉េងសុមប៊ូនស៊ុក រដ្ឋមន្ត្រីក្រសួងធនធានធម្មជាតិ និងបរិស្ថាន បាននិយាយប្រាប់ឱ្យដឹងថា “ទឹកជំនន់នេះ នឹងមិនបង្កឱ្យប៉ះពាល់ដល់ទីក្រុងយ៉ាងធ្ងន់ធ្ងរនោះឡើយ ព្រោះគេរំពឹងថា ក្រុងសុខោទ័យ នឹងមិនរងការប៉ះពាល់ឡើយ ហើយទឹកនឹងស្ងួតទៅវិញ ក្នុងរយៈពេលប៉ុន្មានថ្ងៃខាងមុខ”។
លោកចាក់គ្រីន ភ្លៀនវង់ ជាអភិបាលក្រុងសុខោទ័យ បានឱ្យដឹងថា “មូលហេតុដែលបណ្តាលឱ្យមានទឹកជំនន់នេះគឺ មកពីទំនប់ឃាំងទឹក បានរងការខូចខាត ដែលជាហេតុធ្វើឱ្យផ្លូវគមនាគមន៍ និងផ្ទះសំបែងមួយចំនួន របស់ប្រជាពលរដ្ឋរងការប៉ះពាល់។ ប៉ុន្តែ យើងបានរៀបចំកន្លែងស្នាក់នៅសម្រាប់ប្រជាជន ១.០០០នាក់ រួចជាមុនហើយ រួមទាំងឧបករណ៍សម្រាប់ដឹកជញ្ជូនទ្រព្យសម្បត្តិ និងប្រជាជនផងដែរ”។
គួរបញ្ជាក់ថា កាលពីថ្ងៃម្សិលមិញនេះដែរ មានរបាយការណ៍ថា ស្រុកចំនួន៦ នៅក្នុងខេត្តអយុធ្យា បានលិចលង់ដោយទឹកជំនន់។ ប៉ុន្តែ មន្ត្រីផ្នែកធនធានទឹក និងឧតុនិយមរបស់ប្រទេសថៃ រំពឹងថា កម្រិតទឹកនឹងនឹង ឬអាចស្រកចុះ ប្រសិនបើគ្មានភ្លៀង ក្នុងរយៈពេលប៉ុន្មានថ្ងៃខាងមុខ ហើយពួកគេនឹងនៅតែបន្តតាមដានស្ថានភាពទឹកជំនន់ជាប់ជានិច្ចផងដែរ៕
