ប៉ាគីស្ថាន (BBC, SANA) : យ៉ាងហោចណាស់ មនុស្ស ២៨៩នាក់ បានស្លាប់បាត់បង់ជីវិត ក្នុងហេតុការណ៍អគ្គិភ័យឆាបឆេះនៅរោងចក្រពីរកន្លែងផ្សេងគ្នា ក្នុងប្រទេសប៉ាគីស្ថាន។
អគ្គីភ័យមួយ នៅរោងចក្រផលិតស្បែកជើងក្នុងទីក្រុងឡាហ័រ (Lahore) បានបណ្តាលឱ្យមនុស្ស ២៥នាក់ ស្លាប់ ហើយក្រោយមក មនុស្សជាច្រើននាក់ផ្សេងទៀត បានស្លាប់ ពេលដែលអគ្គិភ័យមួយទៀតបានឆាបឆេះ នៅរោងចក្រកាត់ដេរមួយ ក្នុងក្រុងការ៉ាជី ។
រថយន្តពន្លត់អគ្គិភ័យចំនួន៤០ គ្រឿង កំពុងធ្វើប្រតិបត្តិការពន្លត់អគ្គិភ័យនៅក្រុងការ៉ាជី។
បើតាមការស៊ើបអង្កេត អគ្គិភ័យទាំងពីរកន្លែងនេះ បណ្តាលមកបញ្ហាខុសបច្ចេកទេសម៉ាស៊ីនភ្លើង។
មន្ត្រីជាន់ខ្ពស់ប៉ាគិស្ថាន ម្នាក់ គឺលោករ៉ូសាន សេក(Roshan Shaikh) បាននិយាយថា "មកទល់រសៀលម្សិលមិញនេះ មានមនុស្ស២៨៩នាក់ ហើយ បានស្លាប់បាត់បង់ជីវិត។
នាយករដ្ឋមន្ត្រីប៉ាគីស្ថាន លោករ៉ាចា ពែរវេស អាស្រាហ្វ (Raja Pervez Ashraf) បានបញ្ជាក់ពីអារម្មណ៍រន្ធត់តក់ស្លុតរបស់លោក និងទុក្ខព្រួយយ៉ាងខ្លាំង ក្រោយពីទទួលបានដំណឹងគ្រោះមហន្តរាយនេះ។
ក្នុងទីក្រុងឡាហ័រ មន្ត្រីសុខាភិបាលបាននិយាយថា មនុស្សមួយចំនួន បានស្លាប់បាត់បង់ជីវិត ដោយសារភ្លើងរលាកឆាបឆេះខ្លាំងពេក ខណៈដែលអ្នកដទៃទៀត ឈ្លក់ផ្សែង ថប់ដង្ហើមស្លាប់ ដោយសារតែមិនអាចទប់ទល់នឹងផ្សែងភ្លើងឆេះ យ៉ាងសន្ធោសន្ធៅនោះ។
ក្នុងអំឡុងពេលភ្លើងឆេះនោះ មានកម្មករជាង១.០០០នាក់ កំពុងស្ថិតនៅក្នុងរោងចក្រនោះ ខណៈដែលពួកគេកំពុងបើកប្រាក់ខែ។
លោកអាមៀរ ហ្វារូគី (Amir Farooqi ) មន្ត្រីប៉ូលិសជាន់ខ្ពស់ បានប្រាប់បណ្តាញសារព័ត៌មានថា ប៉ូលិស បានឆ្មក់ចូលទៅក្នុងរោងចក្រ ដើម្បីតាមរកម្ចាស់រោងចក្រ។
លោកបាននិយាយបន្ថែមទៀតថា មនុស្ស៣៥ នាក់ បានទទួលរងរបួស ក្នុងហេតុការណ៍នោះ ខណៈដែលសាកសពនៅតែរកឃើញជាបន្តបន្ទាប់ នៅក្នុងរោងចក្រដែលមានកម្មករ៤៥០ នាក់។
លោកស៊ីយ៉េដ កាអ៊ីម អាលីសា(Syed Qaim Ali Shah) ទេសរដ្ឋ មន្ត្រី បាននិយាយថា រដ្ឋាភិបាល នឹងសងការខូចខាតដល់ជនរងគ្រោះបាត់បង់ជីវិត និងអ្នករងរបួស។ ជនរងគ្រោះ បាត់បង់ជីវិតនឹងទទួលបានប្រាក់៣០០.០០០រូពី (ប្រមាណ៣.១០០ដុល្លារអាមេរិក) និង៥០.០០០រូពី (៥២៨ ដុល្លារអាមេរិក) ដល់អ្នករងរបួស៕Agkor thom
