ព័ត៌មានអន្តរជាតិ: ជប៉ុនប្រឈមមុខដាក់គ្នាជាមួយក្រុមនាវានេសាទតៃវ៉ាន់នៅក្បែរកោះជម្លោះ

ក្រុង តូក្យូៈ នាវាឆ្មាំសមុទ្រជប៉ុន បានបាញ់ទឹកដើម្បីបណ្តេញនាវានេសាទតៃវ៉ាន់ប្រមាណ៤០គ្រឿង និងនាវាឆ្មាំសមុទ្រតៃវ៉ាន់៨គ្រឿងឲ្យចេញពីដែនទឹក ដែលជប៉ុនចាត់ទុកថាជារបស់ខ្លួនកាលពីថ្ងៃអង្គារនៅក្នុងរបត់មួយ ដែលគេមិននឹកស្មានដល់ចំពោះជម្លោះមួយ រវាងក្រុងតូក្យូ និងក្រុងប៉េកាំង។

អនុ រដ្ឋមន្ត្រីការបរទេសជប៉ុន លោកឈីកាអូ កាវ៉ាយ (ទីបីស្តាំ) ក្នុងពេលជួបជាមួយសមភាគីចិន ជុំវិញជម្លោះទឹកដីនៅក្រុងប៉េកាំង។ Reuters

ជប៉ុន បានតវ៉ាទៅតៃវ៉ាន់ មួយថ្ងៃបន្ទាប់ពីខ្លួន បានប្តឹងទៅចិន ជុំវិញអ្វីដែលខ្លួនបាននិយាយថា ជាការឈ្លានពានរបស់នាវាចិន។

ទំនាក់ ទំនងចិន-ជប៉ុន បានដុនដាបយ៉ាងខ្លាំងក្នុងខែនេះ បន្ទាប់ពីជប៉ុនបានទិញប្រជុំកោះដែលមានជម្លោះ នៅសមុទ្រចិនខាងកើតដែលជប៉ុនហៅថាកោះសេនកាគូ ហើយចិនវិញហៅថា កោះឌាវយូ ដោយបង្កជាការតវ៉ាប្រឆាំងជប៉ុននៅទូទាំងប្រទេសចិន។

តៃវ៉ាន់ មានទំនាក់ទំនងមិត្តភាពជាមួយជប៉ុន ប៉ុន្តែប្រទេសទាំងពីរ បានឈ្លោះគ្នាជាយូរមកហើយជុំវិញសិទ្ធិនេសាទក្នុងតំបន់នោះ។ ចិន និងតៃវ៉ាន់ អ្នកទាំងពីរសុទ្ធ តែបានលើកឡើងថា ពួកគេ មានមរតកអធិបតេយ្យជាប្រវត្តិសាស្រ្តរបស់ចិន ជុំវិញប្រជុំកោះនេះ។

រដ្ឋមន្ត្រីទីស្តីការរដ្ឋមន្ត្រី ជប៉ុនលោក អូសាមូ ហ៊្វូជីមូរ៉ា បានថ្លែងថា ឆ្មាំសមុទ្រ បានប្រើកាណុងបាញ់ទឹក និងវិធានការផ្សេងទៀតដើម្បីធ្វើឲ្យនាវាតៃវ៉ាន់ទាំងនោះ ផ្លាស់ប្តូរទិសដៅ។

ឆ្មាំសមុទ្រជប៉ុន បាននិយាយថា ក្រុមនាវានេសាទតៃវ៉ាន់ និងនាវាឆ្មាំសមុទ្រទាំងអស់ ចាប់តាំងពីពេលនោះមក បានចាកចេញពីដែនទឹកនោះ។

ទូរទស្សន៍ ជប៉ុន NHK បានបង្ហាញរូបភាពនៃនាវាឆ្មាំសមុទ្រជប៉ុនបាញ់ទឹកដាក់នាវានេសាទ តៃវ៉ាន់មួយគ្រឿង រីឯនាវាល្បាតតៃវ៉ាន់មួយគ្រឿង បានបាញ់ទឹកដាក់នាវាឆ្មាំសមុទ្រចិនតបវិញ។

ខណៈអ្នកជំនាញ ខ្លះ រំពឹងពីការប្រឈមមុខខាងយោធាមួយ ការប៉ះទង្គិចដោយអចេតនាមួយនៅឯសមុទ្រ នឹងបង្កើនភាពតានតឹង ថ្វីបើគ្រប់ភាគី ត្រូវបានរំពឹងថានឹងព្យាយាមដោះស្រាយជម្លោះនេះមុនពេលវាកើនឡើង មិនអាចគ្រប់គ្រងបានក៏ដោយ។

អុ្នកការទូតកំពូលជប៉ុន អនុរដ្ឋមន្រ្តីការបរទេសលោក ឈីកាអូ កាវ៉ាយ បានស្ថិតក្នុងក្រុងប៉េកាំងដើម្បីជួបប្រជុំជាមួយអនុរដ្ឋមន្រ្តី ការបរទេសចិនលោកចាង ឈីជុន ក្នុងកិច្ចប្រឹងប្រែងដើម្បីកាត់បន្ថយភាពតានតឹង រវាងប្រទេសសេដ្ឋកិច្ចធំបំផុតទាំងពីរនៅអាស៊ី។

លោក ហ៊្វូជីមូរ៉ា បានប្រាប់សន្និសីទកាសែតថា៖ «យើងទើបតែបានដាក់ការតវ៉ាទៅភាគីតៃវ៉ាន់។ គោលជំហររបស់យើង គឺថា នេះ ជាអ្វីដែលចាំបាច់ត្រូវដោះស្រាយក្នុងបរិបទនៃទំនាក់ទំនងទ្វេ ភាគីល្អរវាងជប៉ុននិងតៃវ៉ាន់។ យើង ចង់ដោះស្រាយបញ្ហានេះ ដោយសន្តិវិធី»។

ចំណែកឯក្រសួងកសិកម្មរបស់ចិនវិញ បាននិយាយថា នាវាចិនជិត២០០គ្រឿង បាននិងកំពុងតែ នេសាទនៅក្នុងដែនសមុទ្រជុំវិញប្រជុំកោះថ្មមួយក្រុម នៅក្បែរទីតាំងនេសាទ សម្បូរត្រី ហើយអាចនឹងមានធនធានឧស្ម័នដ៏ច្រើនសន្ធឹកសន្ធាប់ ដែលមានជម្លោះជាមួយជប៉ុន៕ ប្រភពព័ត៌មានៈ ភ្នំពេញប៉ុស្តិ៍