ថ្ងៃទី 04 ខែតុលា ឆ្នាំ2012, ម៉ោង 06:22 AM ប្រែសម្រួលៈ ស៊ុនហ្វាន
ស្ត្រីម្នាក់ និងកូនរបស់នាង៣ នាក់ បានស្លាប់ ក្នុងចំណោមជនរងគ្រោះ ដែលរងការវាយប្រហារដោយគ្រាប់ផ្លោងរបស់កងកម្លាំងស៊ីរី នៅភូមិអាក់ខាកែល(Akcakale)។
នេះជាការឆ្លើយតបលើកដំបូងរបស់ទួរគី ទៅលើប្រទេសស៊ីរី ក្នុងអំឡុងពេលបះបោររយៈពេល ១៨ខែ ប្រឆាំងនឹងប្រធានាធិបតីបាសារ អាល់អាសាដ(Bashar al-Assad) ។
ក្រុមអគ្គរដ្ឋទូតអង្គការណាតូ កំពុងពិភាក្សាគ្នា ពីបញ្ហានេះ។ ក្រុមសម្ព័ន្ធមិត្តយោធានេះ បានចេញសេចក្តីថ្លែងការណ៍ថា នឹងបន្តគាំទ្រសមាជិករបស់ខ្លួន(ទួរគី) និងតម្រូវឲ្យមានបទឈប់បាញ់ភ្លាមៗប្រឆាំងនឹងសម្ព័ន្អមិត្តរបស់ខ្លួន ហើយក៏បានអំពាវនាវឲ្យរបបគ្រប់គ្រងស៊ីរី បញ្ចប់ភាពហិង្សា ដែលជាការរំលោភច្បាប់អន្តរជាតិ។
លោករីសេប តាយយីប អឺរហ្គែន(Recep Tayyip Erdogan) នាយករដ្ឋមន្ត្រីទួរគី បាននិយាយថា “កងកម្លាំងរប់យើងនៅតាមព្រំដែន បានឆ្លើយតបតទៅវិញភ្លាមៗ ទៅលើគោលដៅនានា។ ទួរគី នឹងមិនអនុញ្ញាតឲ្យមានការគំរាមកំហែងបែបនេះ មកលើសន្តិសុខជាតិយើងបានទេ”។
ទាក់ទិននឹងការចោទប្រកាន់នេះ ស៊ីរីបាននិយាយថា ខ្លួនកំពុងរកប្រភពដែលបាញ់ឆ្លងដែន ដែលបានវាយប្រហារទៅលើភូមិអាក់ខាកែល។
លោកអមរ៉ាន ហ្សូប៊ី (Omran Zoabi) រដ្ឋមន្ត្រីក្រសួងព័ត៌មានស៊ីរី បានថ្លែងថា “ស៊ីរី សូមសម្តែងមរណទុក្ខ និងសោកស្តាយចំពោះគ្រួសារជនរងគ្រោះ និងប្រជាជនជាមិត្តទួរគីទាំងអស់”។
អគ្គលេខាធិការអង្គការណាតូ លោក លោកអែនដឺរ ហ្វក់ រ៉ាសមូសសេន(Anders Fogh Rasmussen) បានថ្លែងក្រោយហេតុការណ៍នេះ ថា ណាតូ គ្មានបំនងមិនជ្រៀតជ្រែកកិច្ចការផ្ទៃក្នុងស៊ីរីទេ ប៉ុន្តែ បានត្រៀមខ្លួនរួចជាស្រេច ដើម្បីការពារទួរគី ក្នុងករណីចាំបាច់។
លោកស្រីហ៊ីលឡារី គ្លីនតុន(Hillary Clinton) រដ្ឋមន្ត្រីការបរទេសអាមេរិក បានថ្លែងថា”យើងមាកំហឹងយ៉ាងខ្លាង ចំពោះកងទ័ពស៊ីរី ដែលបានបាញ់ឆ្លងព្រំដែន …និងសូមសម្តែងការសោកស្តាយ និងមរណទុក្ខចំពោះការបាត់បង់ជីវិតនៅក្នុងប្រទេសទួរគីផងដែរ”។
ការប៉ះទង្គិចរវាងស៊ីរី និងទួរគី បានបង្កឲ្យមានសម្ពាធកាន់តែខ្លាំងថែមទៀត ទៅលើរដ្ឋាភិបាលស៊ីរី ខណៈដែលនៅក្នុងប្រទេស កាលពីថ្ងៃពុធ មានមនុស្សយ៉ាងតិច ៣៤នាក់ ត្រូវបានសម្លាប់ និងរាប់សិបនាក់រងរបួស ក្នុងហេតុការណ៍បំផ្ទុះគ្រាប់បែកមួយ នៅកណ្តាក់ក្រុងធំទី២ របស់ស៊ីរី អាឡេបប៉ូ(Aleppo)។ ការវាយប្រហារសំដៅទៅលើអគារដែលសំខាន់ៗក្នុងក្រុង ដែលក្រុមយោធាប្រើប្រាស់ ដែលករណីខ្លះធ្វើឡើង ដោយបំផ្ទុះរថយន្ត៕akt
