ធាតុអាកាសក្តៅហែង និងការកើនកំដៅ ពេលនេះកំពុងតែកើតមាននៅក្នុងប្រទេសជប៉ុន ដែលអាកាសធាតុដ៏អាក្រក់នេះបានសម្លាប់មនុស្ស៣នាក់ហើយ ព្រមទាំង២៥០០នាក់ទៀតត្រូវបានបញ្ជូនទៅកាន់មន្ទីរពេទ្យ បន្ទាប់ពីពួកគេមានអាការពិបាកដកដង្ហើមដោយក្ដៅ ក្រហល់ក្រហាយខ្លាំង។
តាមក្រសួងធាតុអាកាសប្រទេសជប៉ុន នៅខេត្ដយ៉ាម៉ាណាស៊ី ភាគកណ្ដាលនៃប្រទេសនេះ សីតុណ្ហភាពបានកើនឡើងដល់ទៅ៣៩,១អង្សាសេ ចំណែកនៅក្នុងតំបន់ផ្សេងទៀត សីតុណ្ហភាពមានចាប់ពី៣៥ អង្សាសេឡើងទៅ។
ក្រសួងគ្រប់គ្រងគ្រោះមហន្ដរាយ និងបង្កាអគ្គិភ័យប្រទេសជប៉ុន ក៏បានឲ្យដឹងដែរថា នៅសបា្ដហ៍ទី១ដើមខែកក្កដានេះ មានពលរដ្ឋជប៉ុនចំនួន ២៥៩៤នាក់ត្រូវបានគេបញ្ជូនទៅកាន់មន្ទីរពេទ្យដើម្បីព្យាបាលដោយសារ ក្ដៅខ្លាំង។ ហើយក្នុងចំណោម ជនរងគ្រោះទាំងនោះ មានពាក់កណ្ដាលស្ថិតក្នុងវ័យចាប់ពី៦៥ឆ្នាំឡើង។
ដើម្បីបង្ការអាកាសធាតុក្ដៅខ្លាំងនេះ រដ្ឋាភិបាលជប៉ុនបានស្នើប្រជាពលរដ្ឋពិសាទឹកឲ្យបានគ្រប់គ្រាន់ និងបញ្ចៀសសកម្មភាពកម្សាន្ដនានានៅខាងក្រៅ៕